Australia daim passport ces yog ib daig ntawm tsib daim uas muaj fwj chim tshaj plaws hauv ntiaj teb raws li cov kev teev zum tshiab qhia ces yeej muaj ntau thaj chaws ntau tuaj ntxiv uas tej neeg tau Australia daim passport siv yeej muaj peev xwm mus ntoj ncig tau yam tsis tas thov visa siv lawm.
Raws li Henley Passport Index hais ces Australia kuj raug teev ua zum 5 nrog teb chaws Portugal xyoo 2024 thiab tau nce ntawm theem 8 tsaib no mus ua theem 5 lawm.
Tam sim no ces Australia daim passport tseem tau cov theem siab thaj Meskas daim uas tau poob theem 7 mus ua theem 8 lawm — uas yeej tau poob cov theem passport muaj fwj chim tshaj plaws txij li nws tau theem 1 tib yam li teb chaws Askiv 10 dhau los.
Lub tuam txhab nqes peev lgluam thiab sab laj txog cov kev tsiv teb tsaws chaw Henley & Partners yog tus tsim cov theem Henley Passport Index — uas siv tej xov xwm tau los ntawm lub koom haum International Air Transport Authority coj los piv rau cov kev muaj peev xwm mus tau rau 199 haiv neeg tej passports mus rau 227 thaj chaw yam tsis tas thov visa siv.
Daim passport muaj fwj chim tshaj plaws — thiab yog piv rau Australia daim lawm ho zoo li cas
Australia thiab Portugul ob daim passport los kuj yog cov visa muaj fwj chim ua zum 5 hauv ntiaj teb no thiab kuj muaj peev xwm mus ncig tau rau 189 thaj chaw yam tsis tas thov visa siv — los yog yuav tau thov ib daig visa siv, thov tau ntawv mus xyuas ib lub teb chaws twg los yog thov tau cov electronic travel authority (ETA) thaum tej neeg Australia mus txog ntawm tej chaw ntawd lawm.
Txawm li cas los kuj muaj tej teb chaws tsawg dua li 6 lub uas tej neeg muaj tej passport muaj fwj chim tshaj plaws li teb chaws Singapore yeej muaj peev xwm mus ncig tau yam tsis tas thov visa.
Neeg Sigapore yeej muaj peev xwm mus ncig tau rau ntawm 195 thaj chaw yam tsis tas thov visa ua ntej — ces thiaj ua rau nws tau cov zum passport muaj fwj chim tshaj plaws koom nrog teb chaws Japan xyoo 2022.
Japan los kuj tau zum 1 xyoo 2023, tab sis xyoo no ces tau zum ob tib yam nrog ntau lub teb chaws li Fabkis, Germany thiab Italy. Uas tej tej neeg uas muaj tej passport ntawm tej teb chaws no muaj peev xwm mus ncig tau 192 qhov chaw yam tsis tas thov visa siv.
Hos ntau lub teb chaws ntawm cheeb tsam Southeast Asia ces Thaib tau zum 60, Cob tsib tau zum 88, Nplog tau zum 90 ntawm cov teb chaws uas muaj tej passport muaj fwj chim hauv ntiaj teb.
Hos cov teb chaws ntau lub li Austria, Finland, Ireland, Luxembourg, Netherlands, South Korea thiab Sweden ces tau ua cov teb chaws muaj tej passport muaj fwj chim tshaj plaws hauv ntiaj teb ua zum 3 thiab muaj peev xwm mus ncig tau 191 lub teb chaws yam tsis tas thov visa siv.
Tej teb chaws New Zealand, Denmark, Belgium, Norway, Switzerland thiab Askiv (United Kingdom - UK) ces yog cov teb chaws tej passport muaj fwj chim zum 4 thiab muaj peev xwm mus ncig tau 190 lub teb chaws yam tsis tas thov visa siv.
Cov passports twg yog cov uas tsis muaj fwj chim tshaj plaws?
Teb chaws Afghanistan daim passport ces tau zum 103 uas tau zum kawg ntawm daim list uas muaj peev xwm mus ncig tau 26 lub teb chaws yam tsis tas thov visa siv — thiab yog daim passport tau cov zauv tsawg tshaj plaws raws li tau teev tej xov xwm no ntawm nws tej keeb kwm 19 xyoo.
Syria daim ces tau zum 102 thiab tsuas muaj peev xwm mus ncig tau 28 lub teb chaws yas tsis tas thov visa xwb, hos Iraq daim ces tau zum 101 uas tsuas mus ncig tau 31 lub teb chaws yam tsis tas thov visa siv xwb.
Yog xam rau 5 daim passport uas tsis muaj fwj chim tsawg tshaj plaws ces Yemen thiab Pakistan ob daig passport tsuas tau zum 100 thiab mus ncig tau 33 lub teb chaws yam tsis tas thov visa siv; Somalia tau zum 99 thiab mus ncig tau 35 lub teb chaws yam tsis tas thov visa siv; Nepal thiab Libya ces tau zum 98 thiab mus ncig tau 39 lub teb chaws yam tsis tas thov visa siv.
Ces raws li Christian Kaelin uas yog tus coj lub tuam txhab Henley & Partners hais ''Ces vim rau qhov lub caij 20 dhau los no yeej pom tias muaj tej neeg tau txais kev ywj pheej zog rau cov kev ntoj ncig tuaj ntxiv lawm, thiab yeej tau muaj tej chaws uas tej neeg mus ncig tau yam tsis tas thov visa siv ntau tuaj ntxiv yuav laug txog ob npaug ntawm 58 lub teb chaws xyoo 2006 mus ncig tau 111 lub teb chaws xyoo 2024 lawm.''
"Txawm li cas los kuj pom tias tam sim no muaj cov kev sib tu ncua loj tshaj qub ntxiv rau cov kev muaj peev xwm ncig tau ntiaj teb ntawm cov teb chaws tau cov zum zoo tshaj plaws thiab cov zum kawg lawm, uas Singapore muaj peev xwm mus ncig tau cov teb chaws ntau tshaj plaws txog 169 lub ntxiv yam tsis tas thov visa siv yog piv rau tej uas Afghanistan muaj peev xwm mus ncig.''
Tej teb chaws twg uas neeg Australia muaj peev xwm mus ncig tau yam tsis tas thov visa siv?
Qee cov teb chaws ze tshaj plaws uas neeg Australia muaj peev xwm mus ncig tau yam tsis tas thov visa siv ces yog Singapore, Thaib teb (Thailand), Philippines, Malaysia, Suav tuam tshoj (China), New Zealand, Samoa thiab Fiji.
Ntawm cheeb tsam Europe ces tej teb chaws uas neeg Australia muaj peev xwm mus ncig tau yam tsis tas thov visa siv ces yog Czech Republic, Denmark, France, Greece, Italy, Malta, Portugal, Switzerland thiab Askiv (United Kingdom - UK).
Ntawm Africa ces kuj muaj cov teb chaws Botswana, Gambia, Mauritius, South Africa thiab Tunisia uas neeg Australia muaj peev xwm mus ncig tau yam tsis tas thov visa siv.
Hos ntawm cov teb chaws Americas ces cov teb chaws uas neeg Australia muaj peev xwm mus ncig tau yam tsis tas thov visa siv ces yog Barbados, Brazil, Canada, Dominican Republic, Jamaica thiab teb chaws Meskas (United States - US).
Teb chaws Australia ho yog ib lub teb chaws 'qhib kev dav' li cas rau lwm cov neeg tuaj ncig?
Dua ntawm tej list uas teev tej passport muaj fwj chim tshaj plaws uas tej neeg ntoj ncig ntawm ib lub teb chaws twg muaj peev xwm mus ncig tau ntawm lwm cov teb chaws yam tsis tas thov visa siv ntawd, ces kuj muaj Henley cov Openness Index 2024 txheeb tias seb tej teb chaws ho 'qhib kev dav' li cas rau lwm lub teb chaws tej neeg mus ncig thiab. Ua yog muaj pes tsawg lub teb chaws uas ib lub teb chaws twg muaj peev xwm mus ncig tau ntau lub teb chaws npaum li cas yam tsis tas thov visa siv piv rau lawv tej pej xeem cov kev tau txais kev ywj pheej rau cov kev ntoj ncig.
Yog tham txog kis no ces Australia tau ua lub teb chaws zum 83 ntawm tag nrho 99 lub uas yeej qhib nws lub teb chaws tsawg tshaj plaws rau lwm haiv neeg mus ntoj ncig. Thiab tsuas muaj tej pej xeem ntawm 34 lub teb chaws thiaj muaj peev xwm mus xyuas tau teb chaws Australia yam tsis tas thov visa siv xwb, tab sis neeg Australia yeej muaj peev xwm mus ncig tau 183 lub teb chaws yam tsis tas thov visa siv li.
Ces cov teb chaws uas tso kev dav tshaj plaws rau lwm haiv neeg mus ncig ces yog Burundi, Cape Verde Islands, Comoros, Djibouti, Guinea-Bissau, Kenya, Maldives, Micronesia, Mozambique, Rwanda, Samoa, Timor-Leste thiab Tuvalu.
Thiab tej pej xeem ntawm 198 haiv neeg yeej muaj peev xwm mus ncig tau tej teb chaws no yam tsis tas thov visa siv li.
Hos 3 lub teb chaws uas kaw lawv tej teb chaws nruj tshaj plaws uas tsis tshua muaj neeg mus ncig tau ces yog Turkmenistan, North Korea thiab Afghanistan uas tau zum kawg, thiab Bhutan (3) nrog rau India (5) los kuj yog cov teb chaws 5 lub tom twv uas tau cov zum kawg uas tsis tshua qhib teb chaws rau lwm cov pej xeem ntawm lwm lub teb chaws mus ncig.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm Facebook, Google podcasts, Spotify thiab Apple podcasts. Download SBS Audio app thiab caum SBS Hmong pod follow.
