Tsoom fwv Australia yuav tsim ib tsab cai tshiab los tswj tej tuam txhab social media kom tsis txhob pub tso tej xov xwm cuav rau ntawm lawv tej social media platforms.
Michille Rowland uas yog Australia tus nom tswj cov hauj lwm Communications hais tias ''Yuav nplua 5 feem pua ntawm tej nyiaj tag nrho uas ib lub tuam txhab social media khwv tau thoob ntuj yog tias nws tsis ua raws cai, thiab yuav nplua 2 feem pua ntawm nws tej nyiaj yog tias nws tsis ua raws li tej codes.''
Tsab cai no thiaj yuav ua rau Australia lub koom haum Australian Communication and Media Authority (ACMA) yuav muaj fwj chim ntau tuaj ntxiv, li nws muaj cai hais kom tej tuam txhab social media ua tej hauj lwm no, yuav tsum tau khaws thiab teev tej xwm txheej no thiab qhia tej xwm txheej no rau nom tswv paub.
Txawm li cas los senator David Pocock uas yog ib tug nom kis xeev siab ywj pheej kuj txhawj tias 'tsam muaj teeb meem rau tej neeg cov kev tawm tau tswv yim ywj pheej, thiab xyov tej tuam txhab social media puas yuav xav them tej nyiaj raug nplua rau nom tswv, los yog puas yuav kub siab los txheeb tias tej xovxwm twg tseeb los yog cuav, thiab txhawj tias tsam tej neeg yuav siv tej AI tools coj los tsim tej xov xwm cuav rau lub caij yuav muaj cov kev xaiv tsa'.
Mloog tau SBS Hmong hnub zwj Teeb (Thursday) 6 pm, hnub zwj Hnub (Sunday) 11 am, los yog koom tau ntxiv ntawm Facebook, Google podcasts, Spotify thiab Apple podcasts.Download SBS Audio app thiab caum SBS Hmong pod follow.
