នៅថ្ងៃពុធនេះ ប្រទេសអូស្ត្រាលីបានរាយការណ៍ចំនួនមនុស្សស្លាប់ដោយសារកូវីដ-19 យ៉ាងហោចណាស់ 39 នាក់ រួមទាំង 17 នាក់នៅរដ្ឋវិចថូរៀ 11នាក់នៅរដ្ឋញូវសៅវែល និង 10នាក់នៅរដ្ឋគ្វីនស្លេន។ រដ្ឋអូស្ត្រាលីភាគខាងលិច បានរាយការណ៍ពីការស្លាប់ជាប្រវត្តិសាស្ត្រចំនួនពីរករណី។
រដ្ឋវិចថូរៀបានរាយការណ៍ថា មានមនុស្ស 567នាក់ដែលមានផ្ទុកកូវីដ-19កំពុងតែសម្រាកព្យាបាលនៅក្នុងមន្ទីរពេទ្យ ដែលជាចំនួនខ្ពស់បំផុត គិតចាប់តាំងពីថ្ងៃទី 4 ខែមេសាមក។
ពិនិត្យមើលនិន្នាការចុងក្រោយបំផុតនៃកូវីដ-19 សម្រាប់ករណីឆ្លងថ្មី ការសម្រាកព្យាបាលនៅមន្ទីរពេទ្យ និងការស្លាប់នៅក្នុងប្រទេសអូស្ត្រាលីនៅទីនេះ។
រដ្ឋអូស្ត្រាលីខាងត្បូង (SA) បានលុបចោលសេចក្តីប្រកាសអាសន្នធំនៃកូវីដ-19 បន្ទាប់ពីបានប្រកាសចេញអស់រយៈពេល793 ថ្ងៃ។ វាមានន័យថា រដ្ឋនេះមិនអាចដាក់ការរឹតបន្តឹងថ្មីទៀតទេ ប៉ុន្តែបន្ធូរបន្ថយការរឹតបន្តឹងនាពេលបច្ចុប្បន្ន។
រដ្ឋអូស្រ្តាលីខាងត្បូងនឹងបញ្ចប់តម្រូវការពាក់ម៉ាសមុខជាកំហិត សម្រាប់សិស្សវិទ្យាល័យនៅសប្តាហ៍ក្រោយ។
រដ្ឋាភិបាលរដ្ឋនេះបាននិយាយថា "ម៉ាសមុខនឹងតម្រូវឲ្យពាក់នៅសាលារៀន ក្នុងកាលៈទេសៈដែលថ្នាក់រៀនមួយរាយការណ៍ករណីឆ្លង 10 ករណីឬច្រើនជាងនេះក្នុងរយៈពេលប្រាំពីរថ្ងៃ ឬក៏សាលារៀនមួយមានប្រាំថ្នាក់ ដែលមានករណីឆ្លងប្រាំករណីឬច្រើនជាងនេះក្នុងរយៈពេលប្រាំពីរថ្ងៃ" ។
ឥឡូវនេះប្រជាជនអូស្ត្រាលីមានជម្រើសក្នុងការកក់ទុកការចាក់វ៉ាក់សាំងបង្ការកូវីដ-19របស់ពួកគេ តាមរយៈសារជាអក្សរ។
ពួកគេត្រូវវាយពាក្យ 'Hey EVA' ហើយផ្ញើទៅលេខ 0481611382។ ពួកគេនឹងទទួលបានការហៅត្រលប់មកវិញពីភ្នាក់ងារដែលបានទទួលការបណ្តុះបណ្តាល ដើម្បីកក់ទុកការណាត់ជួបរបស់ពួកគេ។ ក្រុម EVA ដំណើរការប្រាំពីរថ្ងៃក្នុងមួយសប្តាហ៍ ពីម៉ោង 7 ព្រឹកដល់ម៉ោង 10 យប់ ម៉ោងស្តង់ដារអូស្រ្តាលីខាងកើត (AEST) ។
ដែនដីរដ្ឋធានីអូស្រ្តាលី ACT បានជូនដំណឹងថា មជ្ឈមណ្ឌលធ្វើតេស្តរកកូវីដ-19 ភាគច្រើននឹងនៅតែបើក នៅទិវាផ្សះផ្សាជាតិ (Reconciliation Day) នាថ្ងៃចន្ទ ទី 30 ឧសភា ឆ្នាំ 2022។
រដ្ឋអូស្រ្តាលីខាងលិច មានបំណងចង់ធ្វើកិច្ចព្រមព្រៀងជាមួយរដ្ឋាភិបាលបក្សលេប័រដែលទើបជាប់ឆ្នោតថ្មី ដើម្បីតាមពលរដ្ឋអូស្រ្តាលីដែលជាគិលានុបដ្ឋាយិកានៅបរទេស ឲ្យឆាប់ត្រឡប់មកវិញ ប្រសិនបើពួកគេមានឆន្ទៈចង់ផ្លាស់ប្តូរទីលំនៅ។
ការផ្លាស់ប្តូរនេះកើតឡើងចំពេលដែលការកើនឡើងនៃចំនួនករណីឆ្លងកូវីដ-19 និងកង្វះខាតបុគ្គលិកសុខាភិបាលជួរមុខនៅក្នុងរដ្ឋនេះ។
ស្វែងរកគ្លីនីកធ្វើតេស្តកូវីដ-១៩
ចុះបញ្ជីលទ្ធផលតេស្តរហ័ស (RAT) របស់អ្នកនៅទីនេះ ប្រសិនបើអ្នកទទួលបានលទ្ធផលវិជ្ជមាន
មុនពេលអ្នកធ្វើដំណើរចេញទៅក្រៅប្រទេស ចូរពិនិត្យតម្រូវការធ្វើដំណើរនិងដំបូន្មានចុងក្រោយគេបង្អស់។
