ក្មេងស្រីកម្ពុជាម្នាក់ដែលត្រូវបានគេជួញដូរនៅប្រទេសចិន បានវិលត្រឡប់មកដល់កម្ពុជាវិញហើយ

ក្មេងស្រីកម្ពុជាម្នាក់ អាយុ ១៦ឆ្នាំ នៅខេត្តត្បូងឃ្មុំ ដែលត្រូវបានគេជួញដូរ នៅប្រទេសចិន ត្រូវបានជួយសង្គ្រោះ ហើយកាលពីថ្ងៃទី១៩ ខែមីនា ឆ្នាំ២០២៤ នេះ នាងបានវិលត្រឡប់មកពីប្រទេសចិន មកដល់កម្ពុជាវិញហើយ។

ក្មេងស្រីកម្ពុជាម្នាក់ ដែលត្រូវបានគេជួញដូរនៅប្រទេសចិន បានវិលត្រឡប់មកដល់កម្ពុជាវិញហើយ

នៅពេលមកដល់អាកាសយានដ្ឋានអន្តរជាតិភ្នំពេញ ក្មេងស្រីរងគ្រោះ បានថ្លែងតាមរយៈវិដេអូខ្លីប យ៉ាងដូច្នេះថា៖ ( សំឡេង )

លោក ទូច សុខៈ អ្នកនាំពាក្យរងក្រសួងមហាផ្ទៃ បានបញ្ជាក់យ៉ាងដូច្នេះថា៖

( សំឡេង )

ក្មេងស្រីរងគ្រោះរូបនេះ មានស្រុកកំណើត នៅខេត្តត្បូងឃ្មុំ បានអះអាងថា នាងត្រូវបានគេជួញដូរពីកម្ពុជា យកទៅលក់នៅប្រទេសចិន ដោយបង្ខាំងនាង ឱ្យនៅតែក្នុងបន្ទប់ អស់រយៈពេល ៥ខែ ទៅ ៦ខែមកហើយ។

ក្មេងស្រីរងគ្រោះ បានរៀបរាប់ ក្នុងខ្លីបវិដេអូ បង្ហោះក្នុងហ្វេសប៊ុក កាលពីថ្ងៃទី៩មីនា ឆ្នាំ២០២៤ ដោយលើកឡើងថា នាងបានចាញ់បោកមេខ្យល់ ដោយត្រូវគេលួងលោម យកនាងទៅធ្វើការ នៅប្រទេសចិន។ ប៉ុន្តែទៅដល់ប្រទេសចិន នាងត្រូវបានគេយកទៅលក់ ហើយបង្ខំឱ្យយកប្តីចិន និងចាប់នាងឃុំ ក្នុងបន្ទប់ ៥ ទៅ ៦ខែហើយ។

សូមរម្លឹកថា ករណីស្ត្រីខ្មែរយើង ចាញ់បោកគេ ពិសេសក្មេងស្រី យកទៅលក់ នៅបរទេស បានកើតឡើងយូរមកហើយ។ ពួកគេ ត្រូវបានមេខ្យល់លួងលោម យកទៅរៀបការប្តីបរទេស ពិសេសប្តីជាជនជាតិចិន ហើយត្រូវបានគេលក់ និងទទួលរងនូវការធ្វើបាបគ្រប់បែបយ៉ាង។

កន្លងមក អាជ្ញាធរសមត្ថកិច្ចកម្ពុជា បានសហការជាមួយអាជ្ញាធរសមត្ថកិច្ចប្រទេសនានា បានជួយសង្គ្រោះជនរងគ្រោះបានច្រើននាក់ ពីការជួញដូរផ្លូវភេទ និងជួញដូរកម្លាំងពលកម្មនៅបរទេស ហើយបញ្ជូនត្រឡប់មកកាន់ប្រទេសកម្ពុជាវិញ ជាបន្តបន្ទាប់ផងដែរ៕