យុវជនកម្ពុជាជិះកង់ពីអង្គរវត្តទៅកាន់ទ្វីបអឺរ៉ុប ដើម្បីរៃអង្គាសថវិកាជូនដល់មន្ទីរពេទ្យកុមារ

លោក ទីវ តារារិទ្ធិ អ្នកបង្កើតមាតិកា និងជាអ្នកផ្សងព្រេងឯករាជ្យ នឹងលះបង់ពេលវេលា កំលាំងកាយចិត្ត ថវិកា ឃ្លាតឆ្ងាយពីក្រុមគ្រួសារ មិត្តភក្តិ ជាតិមាតុភូមិ ដោយត្រូវជិះកង់តែម្នាក់ឯងផ្សងពេ្រងរយៈពេល ១ឆ្នាំពេញ គិតចាប់ពីថ្ងៃទី៦ មិថុនា ២០២៤ រហូតដល់ដើម ខែមិថុនា ឆ្នាំ២០២៥ ខាងមុខ ដោយជិះកង់ចេញពីប្រទេសកម្ពុជា ឆ្ពោះទៅកាន់បណ្តាប្រទេស ក្នុងទ្វីបអឺរ៉ុប ដោយឆ្លងកាត់ប្រទេសមួយចំនួន ក្នុងទ្វីបអាស៊ី សរុបប្រមាណជា ២៥ប្រទេស ដើម្បីរៃអង្គាសថវិកា ដល់កុមារកម្ពុជា ដែលកំពុងសម្រាកព្យាបាលនៅក្នុងមន្ទីរកុមារអង្គរ និងមន្ទីរពេទ្យជ័យវរ្ម័នទី៧ ឬមន្ទីរពេទ្យគន្ធបុប្ផា នៅក្នុងខេត្តសៀមរាប។

លោក ទីវ តារារិទ្ធិ ជិះកង់ពីអង្គរវត្តទៅកាន់ទ្វីបអឺរ៉ុប ដើម្បីរៃអង្គាសថវិកាជូនដល់មន្ទីរពេទ្យកុមារនៅសៀមរាប។

កាលពីព្រឹកថ្ងៃទី៦ ខែមិថុនា ឆ្នាំ២០២៤ លោក ទីវ តារារិទ្ធ បានចាប់ផ្តើមជិះកង់ ចេញពីទឹកដីអង្គរ ក្នុងខេត្តសៀមរាប ទៅកាន់ទ្វីបអឺរ៉ុបហើយ។

លោក ទីវ តារារិទ្ធ ដែលត្រូវបានគេចាត់ទុកថា ជាជនជាតិកម្ពុជាដំបូងបំផុត ដែលអង់អាចក្លាហាន ហ៊ានយកជីវិត ដើម្បីកុមារកម្ពុជា បានបញ្ជាក់ពីបេសកកម្មរបស់លោក យ៉ាងដូច្នេះថា៖ ( សំឡេង )

ប្រិយមិត្ត អាចតាមដានព័ត៌មាននៃដំណើរជិះកង់របស់លោក ទីវ តារារិទ្ធ និងយុទ្ធនាការរៃអង្គាសមូលនិធិនេះ នៅលើទំព័រហ្វេសប៊ុក Travel with Rith - ធ្វើដំណើរជាមួយរិទ្ធិ។

សូមរម្លឹកថា កាលពីឆ្នាំមុន លោក ទីវ តារារិទ្ធ បានចំណាយពេលអស់ជិត ៣ខែ ដើម្បីជិះកង់ ឆ្លងកាត់ប្រទេសមួយចំនួន នៅតំបន់អាស៊ាន ដើម្បីរៃអង្គាសថវិកា ជួយដល់មន្ទីរពេទ្យកុមារអង្គរ នៅខេត្តសៀមរាប។ បេសកកម្មកាលណោះ លោក ទីវ តារារិទ្ធ ទទួលបានថវិកាជាង ៦ម៉ឺនដុល្លារអាមេរិក ជូនដល់មន្ទីរពេទ្យកុមារអង្គរ។

សម្រាប់បេសកកម្មដ៏វែងឆ្ងាយ និងមានរយៈពេលដល់ទៅ ១ឆ្នាំ ជិះកង់ពីប្រទេសកម្ពុជា ទៅកាន់ទឹកដីអឺរ៉ុប លើកនេះ លោក ទីវ តារារិទ្ធ បានដាក់គោលដៅស្វែងរកថវិកាពីសប្បុរសជន ឱ្យបាន ២៥ម៉ឺនដុល្លារអាមេរិក ដើម្បីយកមកជួយដល់មន្ទីរពេទ្យកុមារអង្គរ និងមន្ទីរពេទ្យគន្ធបុប្ផា នៅខេត្តសៀមរាប សម្រាប់ពិនិត្យ និងព្យាបាលជំងឺដល់កុមារកម្ពុជា ដោយមិនគិតថ្លៃ៕