អ្នកនាំពាក្យតុលាការ ខេត្តសៀមរាប បានបញ្ជាក់ ក្នុងសេចក្តីប្រកាសខ្លីថា ការឃាត់ខ្លួនលោកស្រី ឡេង ចាន់ណា និងបក្ខពួកនេះ ធ្វើឡើងដោយផ្អែកតាមពាក្យបណ្តឹងរបស់ប្រជាពលរដ្ឋ ពាក់ព័ន្ធនឹងបទល្មើសឆបោក រំលោភលើទំនុកចិត្ត និងចេញមូលប្បទានបត្រគ្មានសាច់ប្រាក់។
សេចក្តីប្រកាសព័ត៌មានដដែល បានបញ្ជាក់បន្ថែមថា «ជនសង្ស័យ និងបក្ខពួក នឹងត្រូវបញ្ជូនទៅអយ្យការអមសាលាដំបូងខេត្តសៀមរាប ដើម្បីចាត់ការតាមនីតិវិធី»។
ជុំវិញការឃាត់ខ្លួនលោកស្រី ឡេង ចាន់ណា ដែលមានងារជាឧកញ៉ា និងបក្ខពួកនេះ ត្រូវបានលោក លី វីរៈ អ្នកនាំពាក្យសាលាខេត្តសៀមរាប បញ្ជាក់យ៉ាងដូច្នេះថា៖
( សំឡេង )
សូមរម្លឹកថា ករណីលោកស្រី ឡេង ចាន់ណា ត្រូវបានប្រជាពលរដ្ឋអ្នករងគ្រោះ លើកឡើងថា ពួកគេ បានចាញ់បោកក្រុមហ៊ុនរបស់លោកស្រី ឡេង ចាន់ណា ក្រោមរូបភាព ដាក់ប្រាក់វិនិយោគ ដោយទទួលបានការប្រាក់ខ្ពស់ប្រចាំខែ។ ប៉ុន្តែការប្រាក់ ដែលក្រុមហ៊ុនទូទាត់ឱ្យពលរដ្ឋ មិនបានប៉ុន្មានផង ក្រុមហ៊ុនក៏ឈប់ទូទាត់ ហើយក្រោយមក ក៏ក្រុមហ៊ុនរបស់ឧកញ៉ា ឡេង ចាន់ណានោះ បានប្រកាសថា មិនមានលទ្ធភាពទូទាត់ឱ្យពលរដ្ឋ ដោយសារតែវិបត្តិសេដ្ឋកិច្ចសកល។
