د ۲۰۲۱ کال په اګسټ میاشت کې واک ته د طالبانو تر رسېدلو وروسته تر دې دمه هېڅ هېواد د طالبانو حکومت په رسمیت ندی پېژندلی.مګر بیا هم په یو زیات شمېر هېوادونو کې د سفارتونو چارې طالبانو ته سپارل شوي دي.
د جولای د میاشتې په ۳۰مه نېټه د طالبانو د بهرنیو چارو وزارت د یوې اعلامیې په خپرولو سره په اروپا، کاناډا، متحده ایالتونو او آسټرالیا کې د افغانستان د سیاسي استازولیو لخوا د قونسلي خدمتونو وړاندې کول بې اعتباره اعلان کړل.
د طالبانو له دغه اعلان او یو شمېر محدودیتونو وروسته، په انګلستان او ناروي کې د افغانستان د جمهوریت سفارتونه وتړل شول، خو په آسټرالیا او یو شمېر نورو هېوادونو کې د افغانستان د سفارتونو چارې لا تر اوسه د پخواني حکومت د ډیپلوماټانو لخوا پرمخ وړل کېږي چې له طالبانو سره هېڅ رسمي اړیکې نلري.
په آسټرالیا کې د افغانستان سفارت په خپله فېسبوک پاڼه لیکلي چې په کنبرا کې د افغانستان اسلامي جمهوريت سفارت د افغانانو "په چوپړ کې دی او د دې سفارت قونسلي چارې به د هر ډول اندېښنې د رفع کولو لپاره په پوره ځواک او ثبات سره دوام ولري".
د دغه سفارت لخوا په خپاره شوي پیغام کې راغلي:
" لکه څنګه چې تاسو ته معلومه ده، په دې وروستیو میاشتو کې د طالبانو ډلې هڅې کړي چې د افغانستان اسلامي جمهوريت سیاسي او قونسلي نمایندګیو قونسلي چارو کې خنډ را مینځته کړي. دا کړنې ښايي ځینو هېوادوالو ته د اندیښنې لامل شوي وي."
"دا ډول چلند د خلکو د آزار او بشري حقونو د ښکاره نقض نښه ده، او همدارنګه د نړیوالو کنوانسیونونو څخه ښکاره سرغړونه ده.
"د دې ډلې د کورني او نړیوال مشروعیت نشتوالي له کبله، هغوی ان له افغانستان څخه بهر هم هڅې کوي چې زموږ افغانان وځوروي او نارامه کړي."
په داسې حال کې چې په آسټرالیا کې د افغانستان سفارت فعاله دی او قونسلي خدمتونونه وړاندې کوي، اس بي اس پښتو ته رسېدلي معلومات ښيي، کومو کسانو چې په آسټرالیا کې خپل پاسپورټونه تمدید کړي ، افغانستان ته د سفر اجازه نه ورکول کېږي.
د اس بي اس پښتو خپرونه دلته زموږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
