په وروستیو څو لسیزو کې د ټکنالوژۍ په برخه کې د پام وړ پرمختګونه شوي او یو زیات شمېر داسې مهمه شیان کشف شوي چې نن ورځ د خلکو په ژوند کې مهمه رول لوبوي.
د نړۍ د ځینې نورو هېوادونو په څېر په آسټرالیا کې هم یو شمېر مهمه شیان اختراع شوي چې د آسټرالیایانو ترڅنګ د نړۍ د نورو هېوادونو خلک هم ورڅخه کار اخلي، د بېلګې په توګه د الوتکې بلک باکس، د ټلویزیوني معاینې ماشین، وای فای او د ماشومانو سیټ.
بلک باکس ( Black Box)
د بلک باکس وسیله په ۱۹۵۳م کال کې اختراع شوې، مګر تر ۱۹۶۷م کال پورې یې کاروونه جبري نه وه. آسټرالیا د نړۍ لومړنی هېواد هم دی چې په الوتکو کې د دغې وسیلې کاروونه یې جبري کړې ده.
بلک باکس په اصل کې نارنجي رنګ لري، مګر د الوتکې له غورځېدلو وروسته د دغې وسیلې رنګ د اورلګېدنې له امله تورېږي، له همدې امله ورته بلک باکس وايي.
بلک باکس دوه برخي لري: يوې برخي ته فلايټ ډيټا ريکارډر (FDR) وايي چې د الوتکې معلومات ثبتوي او بلي برخي ته کاک پيټ وايس ريکارډر (CVR) وايي چې د الوتکې په کابین کې د پيلوټانو غږ ثبووي.
بلک باکس په اصل کې نارنجي رنګ لري. Source: AAP
د بلک باکس ترڅنګ آسټرالیایي ساینس پوهانو د الټراسوند یا ټلویزیوني معاینې ماشین هم کشف کړی دی.
په ۱۹۶۱م کال کې د ډېوېډ رابنسن او جورج کوزوف په مشرۍ د څېړونکو یوه ډله په دې توانېدلې ترڅو د الټراسوند ماشین کشف کړي چې د وخت په تېرېدلو سره له دغه ماشین څخه په بېلابېلو برخو کې ګټه اخیستنه پیل شوې او نن ورځ په ټوله نړۍ کې د تلویزیونې معاینې لپاره کارول کېږي.
په ۱۹۶۱ کال کې د ډېوېډ رابنسن او جورج کوزوف په مشرۍ د څېړونکو یوه ډله په دې توانېدلې ترڅو د الټراسوند ماشین کشف کړي. Source: Getty / Getty images
په ۱۹۸۴م کال کې دوه تنه آسټرالیایان هر یو کولن مایکل او رابرټ بویسن په دې توانیدلي ترڅو د ماشومانو لپاره په موټر کې د خوندي سفر لپاره ځانګړی سیټ اختراع کړي.
د ماشومانو د موټر سیټ په آسټرالیا کې د بې بي سیټ (Baby Seat) او بې بي کپسول (Baby Capsule) په نومونو یادېږي.
وای فای (WIFI)
په ۲۱مه پېړۍ کې د انټرنېټ کاروونکي د وای فای (WIFI) له اصطلاح سره اشنا دي او په دې پوهېږي چې وای فای انټرنېټ ته د خلکو د لاسرسي په برخه کې څومره مهمه رول لوبوي.
د آسټرالیا د ساینس او صنعت سازمان یو ټیم په ۱۹۹۲م کال کې په دې توانیدلی ترڅو د وای فای ټکنالوژي اختراع کړي او انټرنیټ ته د خلکو لاسرسی آسانه کړي.
د اس بي اس پښتو خپرونه دلته زموږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
