په کورني ناوړه چلند کې هر وخت فزیکي تاوتریخوالی نه وي شامل بلکې پدې کې ډیری وخت په جبري ډول یا هم په زور سره کنټرول شامل وي.
د کورني تاوتریخوالي ضد کمپاین کوونکي له حکومت څخه غواړي ترڅو په کورنیو اړیکو کې د کنټرول چلندونه هم په جرمونو کې شامل کړي ځکه په کورنیو کې کنټرول ډیری وخت د فزیکي تاوتریخوالی لامل ګرځي.
لیکوالې او تحقیقي ژورنالیستې، جېس هېل څلور کاله د کورني تاوتریخوالي موضوع په اړه څېړنې کړي او پدې اړه یې یو کتاب لیکلي چې د اس بي اس شبکې ورباندې مستند فلم هم جوړ کړی دی.
آغلې جېس هیل وايي، د جبري کنټرول ناوړه طبیعت ډیری وخت د دې لامل ګرځي ترڅو خلک دغه ډول تاوتریخوالي ته هېڅ متوجه نشي.
هغه زیاتوي که چېرې تاسو پیسې نلری او احساس کوئ چې باید د خپل ژوند له شریک څخه د پیسو لپاره غوښتنه وکړئ، یا هم تاسو فکر کوی له خپلې کورنۍ او ملګرو څخه لرې ساتل شوي یاست یا هم تاسو ته کواښ کېږي او په دوامداره توګه په کمه سترګه درته کتل کېږي، نو دغه ډول چلندونو ته جبري یا په زور سره کنټرول وايي.
يادې موضوع په اړه د لا ډيرو معلوماتو ترلاسه کولو لپاره بشپړ رپوټ واورئ.
