ਬਰਾਜ਼ੀਲ ਦੀ ਰਹਿਣ ਵਾਲੀ ਰਿਨਾਟਾ ਟੈਵਰਸ ਸਿਲਵਾ ਕੋਲ ਇਸ ਸਮੇਂ ਕੋਈ ਵੀ ਕੰਮ ਨਹੀਂ ਹੈ। ਬਾਕੀ ਆਸਟ੍ਰੇਲੀਅਨ ਲੋਕਾਂ ਵਾਂਗ ਇਸ ਨੂੰ ਸਰਕਾਰ ਵਲੋਂ ਕੋਈ ਮਦਦ ਨਹੀਂ ਮਿਲ ਪਾ ਰਹੀ ਕਿਉਂਕਿ ਇਹ ਇੱਕ ਅੰਤਰਰਾਸ਼ਟਰੀ ਵਿਦਿਆਰਥੀ ਵੀਜ਼ੇ ਉੱਤੇ ਹੈ।
ਐਸ ਬੀ ਐਸ ਨਿਊਜ਼ ਨਾਲ ਗੱਲ ਕਰਦੇ ਹੋਏ ਇਸ ਨੇ ਕਿਹਾ ਕਿ, ‘ਮੈਨੂੰ ਇਸ ਸਮੇਂ ਬਹੁਤ ਡਰ ਲੱਗ ਰਿਹਾ ਹੈ। ਮੇਰੇ ਕੋਲ ਰਹਿਣ ਲਈ ਕੋਈ ਥਾਂ ਨਹੀਂ ਹੈ’।
ਦੋ ਸਾਲਾਂ ਤੋਂ ਆਸਟ੍ਰੇਲੀਆ ਵਿੱਚ ਰਹਿਣ ਵਾਲੀ 27 ਸਾਲਾਂ ਮਿਸ ਸਿਲਵਾ ਨੇ ਆਪਣੀ ਮਾਸਟਰਸ ਦੀ ਪੜਾਈ ਲਗਭਗ ਮੁਕੰਮਲ ਕਰ ਹੀ ਲਈ ਸੀ। ਪੜਾਈ ਦੇ ਨਾਲ-ਨਾਲ ਇਹ ਇੱਕ ਹੋਟਲ ਵਿੱਚ ਵੀ ਕੰਮ ਕਰ ਰਹੀ ਸੀ ਪਰ ਕੋਵਿਡ-19 ਮੰਦੀ ਕਾਰਨ ਇਸ ਨੂੰ ਨੌਕਰੀ ਤੋਂ ਜਵਾਬ ਮਿਲ ਗਿਆ ਸੀ।
Renata perdeu o emprego durante a pandemia do coronavírus. Source: Catalina Florez/SBS News
ਇਸ ਤੋਂ ਬਾਅਦ ਰਿਨਾਟਾ ਨੂੰ ਕੋਈ ਕੰਮ ਨਹੀਂ ਮਿਲਿਆ ਅਤੇ ਉਹ ਆਪਣੇ ਸਾਥੀ ਉੱਤੇ ਪੂਰੀ ਤਰਾਂ ਨਿਰਭਰ ਹੋਣ ਉੱਤੇ ਮਜ਼ਬੂਰ ਹੋ ਚੁੱਕੀ ਹੈ।
ਲਗਭਗ ਅਜਿਹਾ ਹੀ ਹਾਲ ਹੈ ਇਸੇ ਵੀਜ਼ਾ ਕੈਟੇਗਰੀ ਦੇ ਹੋਰਨਾਂ ਦੋ ਮਿਲੀਅਨ ਲੋਕਾਂ ਦਾ ਵੀ ਜੋ ਕਿ ਪਹਿਲਾਂ ਨਾਲੋਂ ਵਧ ਸ਼ੋਸ਼ਣ ਦਾ ਸ਼ਿਕਾਰ ਹੋ ਰਹੇ ਹਨ।
ਰਿਨਾਟਾ ਨੇ ਦਸਿਆ ਕਿ ਉਸ ਨੂੰ ਇੱਕ ਕੈਫੇ ਵਿੱਚ ਪਰਖ ਦੇ ਅਧਾਰ ਤੇ ਕੰਮ ਦੀ ਪੇਸ਼ਕਸ਼ ਵੀ ਹੋਈ ਸੀ ਜਿੱਥੇ ਉਸ ਨੂੰ ਪੰਜ ਘੰਟੇ ਬਿਨਾਂ ਪੈਸਿਆਂ ਤੋਂ ਕੰਮ ਕਰਨ ਲਈ ਕਿਹਾ ਗਿਆ ਸੀ।
‘ਪਰਖ ਵਿੱਚ ਪਾਸ ਹੋਣ ਉੱਤੇ 17 ਡਾਲਰ ਪ੍ਰਤੀ ਘੰਟਾ ਦਿੱਤੇ ਜਾਣ ਦਾ ਵਾਅਦਾ ਕੀਤਾ ਗਿਆ ਸੀ, ਪਰ ਮੈਨੂੰ ਇਹ ਕੰਮ ਛੱਡਣਾ ਹੀ ਚੰਗਾ ਲੱਗਿਆ ਕਿਉਂਕਿ ਆਸਟ੍ਰੇਲੀਆ ਵਿੱਚ ਘੱਟੋ-ਘੱਟ ਮਿਲਣ ਵਾਲੀ ਤਨਖਾਹ 19 ਡਾਲਰ 84 ਸੈਂਟ ਪ੍ਰਤੀ ਘੰਟਾ ਹੈ’।
ਯੂਨਿਅਨਸ ਐਨ ਐਸ ਡਬਲਿਊ ਵਲੋਂ ਮਾਰਚ ਅਤੇ ਮਈ ਦੌਰਾਨ ਕਰਵਾਏ ਸਰਵੇਖਣ ਜਿਸ ਨੂੰ ਹਾਲ ਵਿੱਚ ਹੀ ਜਾਰੀ ਕੀਤਾ ਗਿਆ ਹੈ ਵਿੱਚ ਦਸਿਆ ਗਿਆ ਹੈ ਕਿ ਸਰਵੇਖਣ ਕੀਤੇ ਗਏ 65% ਲੋਕਾਂ ਨੇ ਦਸਿਆ ਹੈ ਕਿ ਉਹਨਾਂ ਦੀ ਨੌਕਰੀ ਚਲੀ ਗਈ ਸੀ। ਇਹਨਾਂ ਵਿੱਚੋਂ 60% ਅੰਤਰਰਾਸ਼ਟਰੀ ਵਿਦਿਆਰਥੀ ਸਨ। ਅਤੇ 39% ਨੇ ਮੰਨਿਆ ਕਿ ਉਹਨਾਂ ਕੋਲ ਰਹਿਣ ਅਤੇ ਖਾਣ ਲਈ ਕੋਈ ਪੈਸੇ ਨਹੀਂ ਹਨ।
34% ਪਹਿਲਾਂ ਹੀ ਬੇਘਰੇ ਹੋ ਚੁੱਕੇ ਸਨ ਕਿਉਂਕਿ ਉਹਨਾਂ ਕੋਲ ਕਿਰਾਇਆ ਭਰਨ ਦੇ ਪੈਸੇ ਨਹੀਂ ਸਨ। 23% ਨੇ ਕਿਰਾਇਆ ਬਚਾਉਣ ਲਈ ਹੋਰਨਾਂ ਨਾਲ ਰਹਿਣਾ ਸ਼ੁਰੂ ਕਰ ਦਿੱਤਾ ਹੈ।
43% ਨੇ ਮੰਨਿਆ ਕਿ ਉਹ ਕਈ ਕਈ ਵਾਰ ਖਾਣਾ ਨਹੀਂ ਖਾ ਪਾਉਂਦੇ (ਇਹਨਾਂ ਵਿੱਚੋਂ 46% ਵਿਦਿਆਰਥੀ ਸਨ)।
ਯੂਨਿਅਨ ਦੇ ਸਕੱਤਰ ਮਾਰਕ ਮੋਰੇ ਨੇ ਕਿਹਾ ਕਿ, ‘ਬਿਨਾਂ ਮਦਦ ਦਿਤਿਆਂ ਅਸੀਂ ਇਹਨਾਂ ਨੂੰ ਨਾ ਸਿਰਫ ਭੁੱਖਮਰੀ ਬਲਕਿ ਸ਼ੋਸ਼ਣ ਵੱਲ ਵੀ ਧੱਕ ਰਹੇ ਹਾਂ’।
‘ਇਹਨਾਂ ਨੂੰ ਇੱਥੇ ਆਉਣ ਲਈ ਉਤਸ਼ਾਹਤ ਕੀਤਾ ਗਿਆ ਸੀ, ਇਹਨਾਂ ਨੇ ਇੱਥੇ ਰਹਿੰਦੇ ਹੋਏ ਟੈਕਸ ਵੀ ਭਰੇ ਹਨ। ਹੁਣ ਤੁਸੀਂ ਘਰ ਨਹੀਂ ਜਾ ਸਕਦੇ ਅਤੇ ਅਸੀਂ ਵੀ ਤੁਹਾਡੀ ਕੋਈ ਮਦਦ ਨਹੀਂ ਕਰਨੀ। ਇਹ ਕੁੱਝ ਆਸਟ੍ਰੇਲੀਆ ਵਰਗੇ ਮੁਲਕ ਵਿੱਚ ਨਹੀਂ ਹੋਣਾ ਚਾਹੀਦਾ’।
ਇਸ ਤੋਂ ਪਹਿਲਾਂ ਯੂਨਿਵਰਸਿਟੀ ਆਫ ਨਿਊ ਸਾਊਥ ਵੇਲਜ਼ ਅਤੇ ਯੂ ਟੀ ਐਸ ਵਲੋਂ ਕਰਵਾਏ ਇੱਕ ਹੋਰ ਸਰਵੇਖਣ ਵਿੱਚ ਪਤਾ ਚਲਿਆ ਸੀ ਕਿ ਲੋਕਾਂ ਦੀ ਆਰਥਿਕ ਹਾਲਤ ਹੋਰ ਵੀ ਕਮਜ਼ੋਰ ਹੋਣ ਦੇ ਆਸਾਰ ਹਨ। ਅਤੇ ਇਸੇ ਕਾਰਨ ਹੀ ਫੈਡਰਲ ਸਰਕਾਰ ਨੇ ਜੌਬਕੀਪਰ ਅਤੇ ਜੌਬਸੀਕਰ ਭੱਤਿਆਂ ਨੂੰ ਹੋਰ ਅੱਗੇ ਵਧਾਉਣ ਦਾ ਫੈਸਲਾ ਲਿਆ ਸੀ।
ਐਸੋਸ਼ਿਏਟ ਪ੍ਰੋਫੈਸਰ ਲੌਰੀ ਬਰਗ ਨੇ ਕਿਹਾ ਕਿ ਸਰਵੇਖਣ ਕੀਤੇ 6000 ਵਿੱਚੋਂ ਅੱਧੇ ਲੋਕਾਂ ਨੇ ਮੰਨਿਆ ਹੈ ਕਿ ਉਹਨਾਂ ਦੀ ਹਾਲਤ ਆਉਣ ਵਾਲੇ 6 ਮਹੀਨਿਆਂ ਦੌਰਾਨ ਹੋਰ ਵੀ ਕਮਜ਼ੋਰ ਪੈ ਜਾਵੇਗੀ।
‘ਆਸਟ੍ਰੇਲੀਆ ਨੇ ਆਰਜ਼ੀ ਵੀਜ਼ਾ ਧਾਰਕਾਂ ਪ੍ਰਤੀ ਕਠੋਰ ਵਤੀਰਾ ਅਪਣਾਇਆ ਹੋਇਆ ਹੈ। ਇਸ ਵਰਗੇ ਹੋਰ ਦੇਸ਼ਾਂ ਜਿਵੇਂ ਯੂਕੇ, ਕੈਨੇਡਾ, ਨਿਊਜ਼ੀਲੈਂਡ, ਆਇਰਲੈਂਡ ਆਦਿ ਨੇ ਆਰਜ਼ੀ ਵੀਜ਼ਾ ਧਾਰਕਾਂ ਨੂੰ ਮਦਦ ਦੇਣੀ ਜਾਰੀ ਰੱਖੀ ਹੋਈ ਹੈ’।
ਅੰਤਰਰਾਸ਼ਟਰੀ ਵਿਦਿਆਰਥੀ ਐਂਡਰੇ ਨੇ ਜਦੋਂ ਆਪਣੇ ਸੁੱਪਰ ਨੂੰ ਕਢਵਾਉਣਾ ਚਾਹਿਆ ਤਾਂ ਉਸ ਨੂੰ ਪਤਾ ਚੱਲਿਆ ਕਿ ਉਸ ਨੂੰ ਸੁੱਪਰ ਦਿੱਤਾ ਹੀ ਨਹੀਂ ਸੀ ਗਿਆ।
ਇਸ ਦਾ ਕਹਿਣਾ ਹੈ ਇਸ ਸਮੇਂ ਆਸਟ੍ਰੇਲੀਆ ਦਾ ਵੱਕਾਰ ਵੀ ਵਿਗੜ ਰਿਹਾ ਹੈ।
59% ਆਰਜ਼ੀ ਵੀਜ਼ਾ ਧਾਰਕਾਂ ਨੇ ਕਿਹਾ ਕਿ ਉਹ ਦੂਜਿਆਂ ਨੂੰ ਭਵਿੱਖ ਵਿੱਚ ਆਸਟ੍ਰੇਲੀਆ ਆਉਣ ਦੀ ਸਿਫਾਰਸ਼ ਨਹੀਂ ਕਰਨਗੇ।
‘ਇਹ ਸਰਕਾਰ ਉੱਤੇ ਨਿਰਭਰ ਕਰਦਾ ਹੈ ਕਿ ਉਹ ਉਹਨਾਂ ਆਰਜ਼ੀ ਵੀਜ਼ਾ ਧਾਰਕਾਂ ਦੀ ਮਦਦ ਕਰਨ ਲਈ ਅੱਗੇ ਆਏ ਜਿਹਨਾਂ ਦੀ ਨੌਕਰੀ ਖੁੱਸ ਗਈ ਹੈ। ਇਹ ਲੋਕ ਆਪਣੀਆਂ ਨੌਕਰੀਆਂ ਦੁਆਰਾ ਬਣਦਾ ਟੈਕਸ ਭਰ ਰਹੇ ਸਨ’।
ਜੌਬਕੀਪਰ ਅਤੇ ਜੌਬਸੀਕਰ ਨੂੰ ਆਰਜ਼ੀ ਵੀਜ਼ਾ ਧਾਰਕਾਂ ਤੱਕ ਵਧਾਉਣ ਨਾਲ ਸਰਕਾਰ ਉੱਤੇ 20 ਬਿਲੀਅਨ ਡਾਲਰਾਂ ਦਾ ਵਾਧੂ ਬੋਝ ਪਵੇਗਾ।
ਕਾਰਜਕਾਰੀ ਪ੍ਰਵਾਸ ਮੰਤਰੀ ਐਲਨ ਟੱਜ ਨੇ ਐਸ ਬੀ ਐਸ ਨਿਊਜ਼ ਨੂੰ ਇੱਕ ਬਿਆਨ ਜਾਰੀ ਕਰਦੇ ਹੋਏ ਕਿਹਾ ਸੀ ਕਿ ‘ਹਮੇਸ਼ਾਂ ਹੀ ਇਹ ਉਮੀਦ ਕੀਤੀ ਜਾਂਦੀ ਹੈ ਕਿ ਆਰਜ਼ੀ ਵੀਜ਼ਾ ਧਾਰਕ ਆਪਣੇ ਆਪ ਨੂੰ ਸੰਭਾਲਣ ਦੇ ਯੋਗ ਹਨ’।
‘ਇਸੇ ਕਰਕੇ ਸਰਕਾਰ ਨੇ ਇਹਨਾਂ ਵੀਜ਼ਾ ਧਾਰਕਾਂ ਨੂੰ ਆਪਣੇ ਸੁੱਪਰ ਦੀ ਮਦਦ ਲਈ ਮਨਜ਼ੂਰੀ ਦੇ ਦਿੱਤੀ ਸੀ’।
‘ਸਾਡਾ ਸਾਰਾ ਧਿਆਨ ਆਸਟ੍ਰੇਲੀਆ ਦੇ ਨਾਗਰਿਕਾਂ ਅਤੇ ਸਥਾਈ ਨਿਵਾਸੀਆਂ ਦੀ ਭਲਾਈ ਉੱਤੇ ਲੱਗਿਆ ਹੋਇਆ ਹੈ’।
ਰਿਨਾਟਾ ਨੂੰ ਇਹ ਦੇਸ਼ ਬਹੁਤ ਚੰਗਾ ਲਗਦਾ ਹੈ ਅਤੇ ਉਹ ਇਸ ਵਿੱਚ ਭਵਿੱਖ ਵਿੱਚ ਵੀ ਰਹਿਣਾ ਚਾਹੁੰਦੀ ਹੈ।
ਉਹ ਆਪਣੇ ਆਪ ਨੂੰ ਕਿਸਮਤ ਵਾਲਾ ਮੰਨਦੀ ਹੈ ਕਿ ਇਸ ਮੁਸੀਬਤ ਦੇ ਸਮੇਂ ਉਸ ਦਾ ਸਾਥੀ ਉਸ ਦੀ ਮਦਦ ਕਰ ਰਿਹਾ ਹੈ।
ਆਸਟ੍ਰੇਲੀਆ ਵਿੱਚ ਲੋਕਾਂ ਨੂੰ ਇੱਕ-ਦੂਸਰੇ ਤੋਂ ਘੱਟੋ-ਘੱਟ 1.5 ਮੀਟਰ ਦੀ ਦੂਰੀ 'ਤੇ ਰਹਿਣਾ ਚਾਹੀਦਾ ਹੈ। ਇਕੱਠਾਂ ਉੱਤੇ ਲੱਗੀਆਂ ਪਾਬੰਦੀਆਂ ਬਾਰੇ ਆਪਣੇ ਰਾਜ ਅਤੇ ਪ੍ਰਦੇਸ਼ ਦੇ ਨਿਯਮਾਂ ਬਾਰੇ ਜਾਣੋ।
ਕਰੋਨਾਵਾਇਰਸ ਦੀ ਜਾਂਚ ਹੁਣ ਆਸਟ੍ਰੇਲੀਆ ਭਰ ਵਿੱਚ ਵਿਆਪਕ ਤੌਰ 'ਤੇ ਉਪਲੱਬਧ ਹੈ।
ਜੇਤੁਸੀਂ ਠੰਡ ਜਾਂ ਫਲੂ ਦੇ ਲੱਛਣਾਂ ਦਾ ਸਾਹਮਣਾ ਕਰ ਰਹੇ ਹੋ ਤਾਂ ਆਪਣੇ ਡਾਕਟਰ ਨੂੰ ਫੋਨਕਰਕੇ ਟੈਸਟ ਦਾ ਪ੍ਰਬੰਧ ਕਰੋ ਜਾਂ ਕਰੋਨਾਵਇਰਸ ਸਿਹਤ ਜਾਣਕਾਰੀ ਨੂੰ 1800 020 080 ਤੇਸੰਪਰਕ ਕਰੋ।
ਐਸ ਬੀ ਐਸ, ਆਸਟ੍ਰੇਲੀਆ ਦੇ ਵਿਭਿੰਨ ਭਾਈਚਾਰਿਆਂ ਨੂੰ ਕੋਵਿਡ-19 ਦੇ ਵਿਕਾਸ ਬਾਰੇ ਤਾਜ਼ਾ ਜਾਣਕਾਰੀ ਦੇਣ ਲਈ ਵਚਨਬੱਧ ਹੈ।
