༢༠༢༢ ལོའི་བཙན་བྱོལ་བོད་མིའི་མི་འབོར་ཞིབ་བཤེར་ཨོ་གླིང་ནང་འགོ་འཛུགས་བྱས་པ།

ཕྱི་ལོ་༢༠༢༢ ལོའི་བཙན་བྱོལ་བོད་མིའི་མི་འབོར་ཞིབ་བཤེར་འགོ་འཛུགས་གནང་བ་དང་། ཨོ་སི་ཊོ་ལི་ཡའི་ཚབ་དོན་གཅོད་ནས་ཨོ་སི་ཊོ་ལི་ཡའི་མངའ་སྡེ་དང་ས་ཁུལ་སོ་སོའི་ནང་ཡོད་བོད་རིགས་མཐུན་ཚོགས་སོགས་བརྒྱུད་བོད་མི་ཚོས་མི་འབོར་ཞིབ་བཤེར་གྱི་འགེངས་ཤོག་བཀང་དགོས་པའི་བཀོད་ཁྱབ་བཏང་གནང་འདུག

Demographic Survey 2022

Source: SBS Tibetan

སྤྱིར་ད་ཐེངས་ཀྱི་མི་འབོར་ཞིབ་བཤེར་འདིའི་དགོས་དམིགས་ལ་”དང་པོ། བོད་མིའི་སྒྲིག་འཛུགས་ཀྱི་ཆབ་སྲིད་དང་། འཛིན་སྐྱོང་། ཆོས་དང་རིག་གཞུང་། ཤེས་ཡོན། སྤྱི་ཚོགས་བདེ་དོན། དཔལ་འབྱོར་སོགས་ཀྱི་ལས་འཆར་སྤེལ་སྐབས་བསྒྲུབ་བྱའི་དམིགས་ཚད་བྱ་ཡུལ་བཙན་བྱོལ་བོད་མིའི་མི་འབོར་གྲངས་ཐོ་ཚད་ལྡན་ཞིག་དགོས་ངེས་ལ་སོང་། བཙན་བྱོལ་བོད་མིའི་མི་འབོར་གྲངས་མཛོད་ཨ་མ་ཞིག་བཟོ་འཆར།

གཉིས་པ། ད་ཆ་བཙན་བྱོལ་བོད་མི་རྣམས་འཛམ་གླིང་ཤར་ནུབ་གང་སར་ཁ་ཐོར་དུ་གནས་ཡོད་སྟབས། འབྱུང་འགྱུར་བོད་མིའི་རྩ་དོན་དང་འབྲེལ་བའི་ལས་གཞི་སྤེལ་སྐབས་འབྲེལ་མཐུད་བྱ་བདེ་དང་། ལྷག་པར་དུ་དྲ་རྒྱའི་དུས་སྐབས་དང་བསྟུན་གཞུང་འབྲེལ་གྱི་ལས་དོན་ཁག་ཅིག་དྲྭ་ལམ་བརྒྱུད་སྤེལ་རྒྱུ་ངེས་པར་བརྟེན། མི་འབོར་གྲངས་མཛོད་ཚད་ལྡན་ཞིག་དགོས་ངེས་ཡིན།

གསུམ་པ།  བོད་མིའི་སྒྲིག་འཛུགས་ནས་མཐུན་རྐྱེན་ཞུ་སྤྲོད་ཇི་མཆིས་མི་འབོར་གྲངས་བཤེར་གྱི་གྲངས་མཛོད་འདིའི་ཁོངས་ཚུད་ཡོད་མེད་ཞིབ་རྩད་ཀྱིས་རྩ་འཛིན་ཞུ་རྒྱུ།

བཞི་པ། ད་ལྟའི་མི་འབོར་གྲངས་བཤེར་གྱི་ལས་གཞིར་མཉམ་ཞུགས་ཐོ་འགོད་ཐུབ་ཚེ། འབྱུང་འགྱུར་བཙན་བྱོལ་བོད་མིའི་སྤྱི་ཚོགས་ཀྱི་འོས་བསྡུ་ལ་སོགས་པའི་མང་གཙོའི་ཁེ་དབང་ཁག་དེང་དུས་དྲ་རྒྱའི་འགྱུར་འགྲོས་དང་མཐུན་ཅིང་། བོད་མིའི་སྒྲིག་འཛུགས་ཀྱི་ཁྲིམས་སྒྲིག་གཞིར་བཟུང་མཐུན་རྐྱེན་སྦྱོར་སྤྲོད་བྱེད་རྒྱུར་ཐུགས་ཕན་གསོ་ངེས་ཡིན་ཡིན་སྐོར་དང་། ཐེངས་འདིའི་ལས་གཞི་འདི་ཚགས་ཚུད་དོན་ལྡན་ཡོང་སླད་བཙན་བྱོལ་བོད་མི་ཡོངས་ནས་ཕྱར་གྲུ་མཉམ་འདེགས་གནང་དགོས་པའི་འབོད་སྐུལ་ཞུས་གནང་འདུག

གཞན་ཡང་ཐེངས་འདིའི་མི་འབོར་ཞིབ་བཤེར་དང་འབྲེལ་བའི་རྩ་འཛིན་ལམ་སྟོན་ནང་།

“དང་པོ། བོད་མིའི་མི་འབོར་གྲངས་བཤེར་བསྡུ་ལེན་སྐབས་དོ་བདག་གི་དྭང་བླང་དཔྱ་དངུལ་ལག་དེབ་དང་གནས་ཡུལ་རྒྱལ་ཁབ་ཀྱི་ལག་ཁྱེར་གང་ཞིག་ལ་བསྟེན་དགོས།

གཉིས་པ། དྭང་བླངས་དཔྱ་དེབ་མིག་སྟོན་ཞུ་རྒྱུ་ཡོད་མེད་ལ་མ་ལྟོས་པར། བོད་མི་མ་ཡིན་པ་རྣམས་མི་འབོར་གྲངས་བཤེར་འགེངས་ཤོག་བཀང་མི་ཆོག

གསུམ་པ། དོ་བདག་སོ་སོའི་བོད་ཡིག་ཐོག་ཡོད་པའི་མིང་དང་སྐྱེས་ཚེས་དཔྱ་དངུལ་ལག་དེབ་ཨང་གྲངས་བཅས་དཔྱ་དངུལ་ལག་དེབ་དང་གཅིག་མཚུངས་ཡིན་དགོས།

བཞི་པ། དོ་བདག་སོ་སོའི་ཨིན་ཡིག་ཐོག་ཡོད་པའི་མིང་དང་ཕ་མའི་བོད་ཨིན་ཐོག་མིང་རྣམས་དཔྱ་དངུལ་ལག་དེབ་དང་། ཡང་ན་གནས་ཡུལ་རྒྱལ་ཁབ་སོ་སོའི་ལག་ཁྱེར་གང་ཞིག་དང་གཅིག་མཚུངས་ཡིན་དགོས།

ལྔ་པ། ལོ་ན་༦ མན་གྱི་ཕྲུ་གུ་རྣམས་ཀྱི་འགེངས་ཤོག་ཕྲུ་གུའི་སྐྱེས་ཚེས་ལག་འཁྱེར་དང་ཕ་མ་གང་རུང་གི་མིང་དཔྱ་དེབ་དབར་ངེས་པར་མཚུངས་བསྡུར་བྱེད་དགོས།

དྲུག་པ། མི་འབོར་གྲངས་བཤེར་གྱི་འགེངས་ཤོག་བསྡུ་ལེན་སྐབས། མི་གཅིག་གིས་སོ་སོའི་འདོད་གཅིག་ནང་མི་ཇི་ཡོད་ཀྱི་འགེངས་ཤོག་བསྐང་འབུལ་ཆོག་ཅིང་། ནང་དོན་ཞིབ་བཤེར་སླད། ནང་མིའི་འབྲེལ་ཡོད་ཡིག་ཆ་ཁག་མིག་སྟོན་དང་ཞིབ་འཇུག་ངེས་པར་གནང་དགོས།

བདུན་པ། ཨང་གྲངས་བདུན་ཡོད་པའི་དང་བླང་དཔྱ་དངུལ་ལག་དེབ་མེད་པ་རྣམས་ནས་དཔྱ་དངུལ་ལག་དེབ་རྙིང་པའི་ཨང་གྲངས་བཀང་འཐུས་ཀྱང་། འབྲེལ་ཡོད་ལས་བྱེད་ནས་འགེངས་ཤོག་བསྡུ་ལེན་གནང་སྐབས་ལག་དེབ་རྙིང་པ་ལ་རྟོག་ཞིབ་གནང་དགོས་པ་དང་། དཔྱ་དངུལ་ལག་དེབ་རྙིང་པ་ཡོད་པའི་བོད་མི་རྣམས་ཀྱི་ཐོ་གཞུང་ཟུར་དུ་བཟོས་ནས་འགེངས་ཤོག་ལོགས་སུ་འཇོག་ཉར་གནང་དགོས།

བརྒྱད་པ། དོ་བདག་སུ་ཞིག་གནས་སྐབས་རིང་སློབ་སྦྱོང་དང་ལས་ཀའི་ཆེད་ས་གནས་སུ་གནས་སྡོད་ཡོད་པ་རྣམས་ནས་ད་ལྟའི་གནས་སྡོད་ས་གནས་ནས་འགེངས་ཤོག་བཀང་འཐུས་ཀྱང་། གཏན་སྡོད་ཁ་བྱང་ནང་སོ་སོའི་གཏན་འཇགས་སྡོད་སའི་ནང་གི་ཁ་བྱང་དང་། ད་ལྟའི་ཁ་བྱང་ནང་ད་ལྟ་སྡོད་སའི་ཁ་བྱང་འགོད་དགོས། 

དགུ་པ། མི་འབོར་གྲངས་བཤེར་གནང་མཁན་འབྲེལ་ཡོད་ལས་བྱེད་ནས་འགེངས་ཤོག་ཞིབ་བཀང་ཞུས་རྗེས་འགེངས་ཤོག་གི་མཇུག་ཏུ་བདེན་དཔང་ཁུངས་སྐྱེལ་ཆེད་རང་ཉིད་ཀྱི་མཚན་དང་། མཚན་རྟགས། ཟླ་དུས་ཚེས་གྲངས། ས་གནས་བཅས་ངེས་པར་འགོད་དགོས།

བཅུ་པ། དོ་བདག་དང་ཕ་མའི་དྭང་བླང་དཔྱ་དངུལ་ལག་དེབ་མེད་པ་དང་། གནས་ཡུལ་རྒྱལ་ཁབ་ཀྱི་ལག་ཁྱེར་གང་ཡང་མེད་པ་རྣམས་ཀྱི་འགེངས་ཤོག་ཀྱི་མཇུག་ཏུ་ཡོད་པའི་བདེན་དཔང་ཁུངས་སྐྱེལ་གནང་མཁན་༼Verified by༽ས་ཆ་སྟོང་པ་བཞག་ན་འཐུས་རྒྱུ་དང་། ལག་ཁྱེར་གང་ཡང་སྟོན་རྒྱུ་མེད་པ་རྣམས་ཀྱི་ཐོ་གཞུང་ལོགས་སུ་ཟུར་འདོན་གནང་དགོས་རྒྱུ།

བཅུ་གཅིག བོད་མི་སུ་ཞིག་གི་དོ་བདག་སོ་སོའི་གནས་ཚུལ་རྣམས་དྭང་བླང་དཔྱ་དངུལ་དང་གནས་ཡུལ་རྒྱལ་ཁབ་ཀྱི་ལག་ཁྱེར་གཉིས་དབར་མཐུན་གྱི་མེད་ཚེ། འགེངས་ཤོག་ནང་དོ་བདག་གི་དྭང་བླང་དཔྱ་དངུལ་ལག་དེབ་ལྟར་བཀང་ན་འཐུས་རྒྱུ།

བཅུ་གཉིས། མི་འབོར་གྲངས་བཤེར་བསྡུ་ལེན་གནང་མཁན་འབྲེལ་ཡོད་ལས་བྱེད་རྣམས་ནས་འགེངས་ཤོག་ནང་གི་གནད་དོན་རྣམས་གལ་ཆེ་དོན་ཆེར་རྩིས་ཏེ་གསང་བའི་ཐོག་ཉར་ཚགས་གནང་དགོས་པ་དང་། བར་མི་སུ་ལའང་གསང་བ་ཕྱིར་བསྒྲགས་མི་ཆོག་” བཅས་བཀོད་འདུག

ཕྱི་ལོ་ ༢༠༢༢ ལོའི་བཙན་བྱོལ་བོད་མིའི་མི་འབོར་ཞིབ་བཤེར་གྱི་འགེངས་ཤོག་དྲ་ཐག་འདི་ནས་ཕབ་ལེན་བྱེད་ཆོག 


 


Share

Published

Updated

By Sangyal Dorjee

Share this with family and friends


Download our apps
SBS Audio
SBS On Demand

Listen to our podcasts
Independent news and stories connecting you to life in Australia and Tibetan-speaking Australians.
Ease into the English language and Australian culture. We make learning English convenient, fun and practical.
Get the latest with our exclusive in-language podcasts on your favourite podcast apps.

Watch on SBS
SBS World News

SBS World News

Take a global view with Australia's most comprehensive world news service