མལ་ཁྲིའི་འབུ་དང་། འབུ་བྱི་ལོང་། ཙི་ཙི། དུག་སྦྲང་བཅས་ནི་ཁྱབ་ཆེ་ཤོས་ཤིག་རེད། དྲན་སོས་དགོས་པ་ཞིག་ལ་འབུ་སྲིན་གྱི་གནོད་འཚེ་དེས་ཁྱེད་ཀྱི་ཁང་ཁྱིམ་དང་རྒྱུ་ནོར་གྱི་རིན་ཐང་ཡང་དམའ་རུ་གཏོང་སྲིད་པ་ཞིག་རེད།
ལེ་ཚན་འདིའི་ནང་སྡོད་ཁྱིམ་ནང་གི་འབུ་སྲིན་སྐོར་ཆེད་མཁས་པ་ཚོ་དང་མཉམ་དུ་གལ་སྲིད་ཁྱེད་རང་གི་སྡོད་ཁྱིམ་ནང་ལ་འབུ་སྲིན་རིགས་ཡོད་ཚེ་དེ་ཚོ་མེད་པ་བཟོ་སྟངས་དང་ལག་ལེན་གང་འདྲ་བྱེད་དགོས་མིན་སྐོར་རྒྱུས་ལོན་བྱ་རྒྱུ་ཡིན།
སྤྱིར་ཨོ་སི་ཁྲུ་ལི་ཡའི་ནང་དུས་རྒྱུན་འབུ་སྲིན་མང་ཤོས་ནི་ནམ་ཟླ་དྲོ་བའི་དུས་སྐབས་སྟེ། དབྱར་ཁར་འབུ་སྲིན་མང་པོ་ཞིག་སྐྱེ་འཕེལ་བྱེད་བཞིན་ཡོད་པ་དང་། རྒྱུ་མཚན་ནི་འབུ་སྲིན་མང་ཆེ་བ་ཁོང་ཚོ་དྲོད་ཁོལ་དང་རླན་གཤེར་ལ་བརྟེན་ཡོད།
ཡིན་ན་ཡང་དགུན་ཁའི་དུས་སུ་མཚན་མོར་གལ་སྲིད་ཁྱེད་རང་གཉིད་ལས་སད་སྐབས་དུག་སྦྲང་གི་སོ་བརྒྱབ་པ་ལྟར་བུ་ཞིག་ཚོར་ཚེ་དེ་ནི་སེམས་ནང་གང་བྱུང་དྲན་པ་ཞིག་མ་ཡིན་པ་དངོས་སུ་དུག་སྦྲང་གིས་སོ་བརྒྱབ་ཡོད་སྲིད་པ་ཞིག་རེད།
སྐུ་ཞབས་ཁེ་མེ་རོན་ཝི་བུ་ Cameron Webb ལགས་ནི་སིཌ་ནིང་གཙུག་ལག་སློབ་གཉེར་ཁང་དང་ནིའུ་སའོ་ཐི་ཝལ་མངའ་སྡེའི་ནད་རིགས་འཕྲོད་བསྟེན་ལྷན་ཁང་གི་འབུ་སྲིན་རིག་པ་བ་དང་དགེ་རྒན་ཆེན་མོ་གཞོན་པ་ཞིག་རེད།
ཁོང་གིས་དུག་སྦྲང་གི་རིགས་འགའ་ཤས་ནི་ལོ་འཁོར་མོའི་ནང་གནས་ཀྱི་ཡོད་པ་རེད། ང་ཚོར་ཨོ་སི་ཁྲུ་ལི་ཡའི་ནང་ཆ་བཞག་ན་དུག་སྦྲང་གི་རིགས་མི་འདྲ་བ ༣༠༠ ཙམ་ཡོད། དེ་དག་ལས་འགའ་ཤས་ནི་ལོ་གཅིག་གི་གྲང་ངར་ཆེ་བའི་ཟླ་བ་ཁ་ཤས་རིང་ལ་མི་སྣང་བར་འགྱུར་ཡང་། གཞན་དག་ནི་རྒྱུན་དུ་གནས་ཀྱི་ཡོད། དུག་སྦྲང་དེ་ཚོ་ང་ཚོའི་ཁང་པའི་ཉེ་འཁོར་དང་གྲོང་ཁྱེར་གྱི་ས་ཁུལ་དུ་གནས་ཀྱི་ཡོད། དེ་དག་ནི་ཆར་ཆུའི་འཁྱིལ་ས་དང་། རྫིང་བུ། ཆུ་འདམ་སོགས་བརླན་བཤེར་ཡོད་སར་འཁོར་གྱི་ཡོད་པ་རེད་ཅེས་གསུངས་འདུག
ནམ་ཟླ་གྲང་བའི་སྐབས་སུ་དུག་སྦྲང་ཁང་པའི་ནང་དུ་ཡོང་བཞིན་ཡོད་ཀྱང་། དུག་སྦྲང་ལས་བྱུང་བའི་ནད་དུག་འགོས་ཁྱབ་ཀྱི་ཉེན་ཁ་ཅུང་ཆུང་ཆུང་ཡིན་པ་རེད།
ཡང་ཁོང་གིས་གྲང་ངར་ཆེ་བའི་ནམ་དུས་སུ་ཡང་དུག་སྦྲང་གིས་ང་ཚོར་གནོད་འཚེ་གཏོང་གི་ཡོད་ཀྱང་འཕྲོད་བསྟེན་བདེ་ཐང་ལ་དེ་ཙམ་གནོད་ཀྱིི་མེད། དུག་སྦྲང་རྣམས་ཁྱིམ་ནང་དུ་འཕུར་བཞིན་པ་ང་ཚོས་མཐོང་ཐུབ་ལ་དེ་དག་གིས་སོ་འདེབས་ཀྱི་ཡོད་ཀྱང་། དུག་སྦྲང་ལས་འབུ་ཕྲ་སྐྱེད་ནས་ན་ཚ་གཞན་དག་འགོས་པ་ཉེན་ཁ་དེ་ཙམ་མེད་པ་རེད་ཅེས་གསུངས་འདུག
བྱི་ལོང་ Cockroaches ནི་དགུན་དུས་ཁང་པའི་ནང་དུ་དྲོད་ཁོལ་དང་རླན་གཤེར་གྱི་ཁོར་ཡུག་ལ་ཁེ་ཕན་བླངས་ནས་ཟས་རིགས་ཀྱི་ཐོན་ཁུངས་བཀོལ་སྤྱོད་བྱེད་མཁན་གྱི་འབུ་སྲིན་གྱི་རིགས་ཤིག་རེད།
ཌོ་ཊར་ཝེ་བེ་ Dr Webb ལགས་ཀྱིས་ཁྱེད་ཀྱི་ཁྱིམ་དུ་གཙང་སྦྲ་དང་འབུ་སྲིན་འཕེལ་རྒྱས་བཀག་འགོག་ཐུབ་ཚེ་དེས་བྱི་ལོང་དང་ཡང་ན་འབུ་སྲིན་གཞན་དག་་བརྒྱུད་ནས་ནད་རིགས་འགོས་ཁྱབ་འགོག་པར་ཕན་ཐོགས་ཆེན་པོ་ཡོད་པ་རེད་ཅེས་གསུངས་འདུག
གད་སྙིགས་སོགས་གསོག་འཇོག་བྱས་པའི་སྐབས་སུ་འབུ་ཆ་ག་པ་སོགས་འཕེལ་རྒྱས་འགྲོ་གི་ཡོད། ང་ཚོའི་ཁང་པའི་རྒྱབ་རའི་མཐའ་སྐོར་དུ་ཆུ་ཡོད་པ་དང་། སྒེའུ་ཁུང་དང་ཆར་ཆུའི་མཛོད་ཁང་སོགས་ལ་དྲ་ཚགས་བཀབ་མེད་ན་དུག་སྦྲང་སོགས་འཕེལ་རྒྱས་འགྲོ་གི་ཡོད།
གལ་སྲིད་འབུ་སྲིན་གྱིས་གནོད་འཚེ་བྱས་ན་འཕྲལ་དུ་འབུ་གསོད་སྨན་རྫས་དང་རྫས་འགྱུར་གྱི་དུག་སྨན་བེད་སྤྱོད་གཏོང་མི་དགོས་པ་བྱ་རྒྱུ་དྲན་སོས་དགོས་པ་གལ་ཆེན་པོ་ཡིན། དམིགས་བསལ་ཕྱི་རོལ་དུ་དུག་སྨན་བཀོལ་སྤྱོད་བྱས་ན་ལོ་གཅིག་གི་གྲང་ངར་ཆེ་བའི་ཟླ་བ་ཁ་ཤས་རིང་ཕན་ཐོགས་ཅན་གྱི་འབུ་སྲིན་རྣམས་ལའང་གནོད་སྐྱོན་གཏོང་སྲིད་ཅེས་གསུངས་འདུག
ཁོང་གིས་གལ་ཏེ་དགོས་མཁོ་བྱུང་ན་ཁྱེད་ཀྱི་ས་གནས་ཀྱི་ཆེད་དམིགས་ཚོང་ཁང་དང་ཚོང་ཁང་ཆེན་པོའི་ནང་དུ་ཡོད་པའི་འབུ་ཕྲ་གསོད་པའི་ཐོན་རྫས་ཁོ་ན་བེད་སྤྱོད་གཏོང་དགོས་པའམ་ཡང་ན་ཆེད་ལས་པ་ཞིག་ལ་དེ་དག་གི་བཀོལ་སྤྱོད་བྱེད་པར་བཀོད་སྒྲིག་བྱ་རྒྱུ་གལ ཆེན་པོ་རེད་ཅེས་གསུངས་འདུག
ཌེ་ཝེ་ཌི་གྷེ་ David Gay ལགས་ནི་འདས་པའི་ལོ་ངོ་ ༣༠ ཙམ་གྱི་རིང་འབུ་སྲིན་གྱི་གནོད་འགོག་ལས་རིགས་ནང་ཞུགས་མྱོངས་ཡོད་པ་རེད།
ཁོང་གིས་ཉལ་ཁྲིའི་སྟེང་གི་འབུ་ bed bugs དེ་ཚོ་ནི་ལོ་ཧྲིལ་པོར་རྒྱུན་མི་ཆད་པར་མི་རྣམས་གནས་སྡོད་བྱེད་ས་དང་ཚོང་ཁང་སོགས་སུ་མཐོང་རྒྱུ་ཡོད་པའི་གནོད་འབུ་ཞིག་རེད་ཅེས་གསུངས་འདུག
ཁང་པའི་ནང་འབུ་སྲིན་རིགས་གཙང་བཟོ་ཆེད་ཁྱེད་རང་གིས་དམིགས་བསལ་ཆེད་ལས་པར་སྐད་གཏོང་སྐབས། ཁོང་ཚོར་ལག་འཁྱེར་ཡོད་མེད་བལྟ་རྒྱུ་དེ་གལ་ཆེན་པོ་ཡིན་པ་རེད།
གྲོང་ཁྱེར་གྱི་ཁོར་ཡུག་ཆེད་ལས་འབུ་སྲིན་དོ་དམ་པ་ཨོ་སི་ཁྲུ་ལི་ཡའི་ཁོར་ཡུག་འབུ་སྲིན་དོ་དམ་ཚོགས་པ་ Australian Environmental Pest Managers Association (AEPMA) ནི་བཟོ་ལས་ཁང་ཆེ་ཤོས་ཤིག་ཡིན་པ་དང་། ཚོགས་པ་དེའི་ཚོགས་མི་རྣམས་ལ་འབུ་སྲིན་འགོག་བཅོས་ཀྱི་ལས་དོན་སྤེལ་ཆོག་པའི་ཆོག་མཆན་དང་ཉེན་སྲུང་ཚང་མ་ཡོད་པ་རེད།
