གསལ་བསྒྲགས་དེའི་ནང་། “ཨོ་གླིང་སིཌ་ཎི་ཁུལ་གནས་སྡོད་རྒྱལ་གཅེས་བོད་རིགས་སྤུན་ཟླ་རྣམས་རྡོག་རྩ་གཅིག་སྒྲིལ་དང་། མཛའ་མཐུན་མཉམ་གནས་ཀྱི་སྒོ་ནས་བོད་བསྟན་སྲིད་མི་རིགས་དང་བཅས་པའི་དོན་དུ་ནུས་པ་མཉམ་སྤུངས་བྱ་རྒྱུ་དང་། ལྷག་པར་འདས་པ་ལས་མ་འོངས་པ་གལ་ཆེར་ངོས་འཛིན་གྱིས་མདུན་སྐྱོད་ཡོང་སླད་དུ་ཕྱི་ལོ་ ༢༠༢༢ ཟླ་ ༥ ཚེས་ ༢༨ ཉིན་ ཁེན་སྦེ་ར་སྐུ་ཚབ་དོན་གཅོད་ལས་ཁུངས་སུ་སྐུ་ཚབ་དོན་གཅོད་ཀརྨ་སེང་གེ་དང་། བོད་མི་མང་སྤྱི་འཐུས་རྡོ་རིང་བསྟན་འཛིན་ཕུན་ཚོགས་རྣམ་གཉིས་ཀྱི་གཙོ་སྐྱོང་འོག སྐུ་ཚབ་དོན་ཁང་གི་དྲུང་ཆེ་ལྷ་དབང་རྒྱལ་པོ་དང་། ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོ་སྐལ་བཟང་ཚེ་རིང་དང་དྲུང་ཆེ་མགུར་འབུམ་རྒྱལ་བཅས་ནས་ཚོགས་བསྐོངས་ཀྱིས་སིཌ་ཎི་ཁུལ་གྱི་དཀའ་རྙོག་དེ་སེལ་དགོས་རྒྱུའི་གལ་གནད་དང་འབྲེལ་བའི་ལམ་སྟོན་བྱས་པ་ལྟར། སྐབས་དེར་ཚོགས་བཅར་ཞུ་མཁན་འབྲེལ་ཡོད་སིཌ་ཎི་བོད་རིགས་མཐུན་ཚོགས་ཀྱི་འཐུས་ཚབ་ཚོགས་གཙོ་མིག་དམར་ཚེ་རིང་དང་། དྲུང་ཆེ་རྔ་བ་ཆོས་འཛིན། རིག་གཞུང་འགན་འཛིན་བློ་བཟང་ལུང་རིགས། སིཌ་ཎི་བོད་རིགས་དང་བླངས་མི་མང་གི་འཐུས་ཚབ་ཚོགས་གཙོ་འཇིགས་མེད་རྡོ་རྗེ་དང་། ཚོགས་གཞོན་ནོར་བུ་དགྲ་འདུལ། དྲུང་ཆེ་གྲགས་པ་ཚེ་རིང་། སྤྱི་ཚོགས་ཞབས་ཞུ་བ་རྣམ་སྲས་ལྷ་མོ་བཅས་དང་གྲོས་བསྡུར་ཞུས་འབྲས་སུ། སིཌ་ཎི་བོད་རིགས་མཐུན་ཚོགས་ཀྱི་ཚོགས་གཙོ་མིག་དམར་ཚེ་རིང་དང་། ཚོགས་གཞོན་ཐུབ་བསྟན་རྒྱལ་མཚན་གཉིས་ནས་ལས་རྒྱུན་ལྷག་མའི་རིང་ཚོགས་གཙོ་དང་ཚོགས་གཞོན་གྱི་ལས་གནས་མིན་པར་རྒྱུན་ལས་དཀྱུས་མའི་ཁོངས་སུ་བཞུགས་རྒྱུ་དང་ཚབ་གསར་ཚོགས་གཙོ་དང་ཚོགས་གཞོན་གསར་འདེམས་བྱ་རྒྱུ་དང་ཁོང་གཉིས་སྐབས་བཅོ་བརྒྱད་པའི་རྒྱུན་ལས་ཀྱི་འོས་བསྡུའི་ནང་ལངས་རྒྱུ་མིན་པ་དང་། དེ་བཞིན་སིཌ་ཎི་བོད་རིགས་དང་བླངས་མི་མང་གི་ལས་དོན་ཡོངས་རྫོགས་མཚམས་འཇོག་བྱ་རྒྱུ་བཅས་ལ་ཕྱོགས་གཉིས་ཀའི་མོས་མཐུན་ཐག་གཅོད་བྱུང་བ་བཞིན། སིཌ་ཎི་བོད་རིགས་དང་བླངས་མི་མང་ནས་༼ད་རེས་ཀྱི་འདུམ་སྒྲིག་གི་ཐག་གཅོད་ཡིག་ཆ་དེ་ལ་སིཌ་ཎི་བོད་རིགས་དང་བླངས་མི་མང་གི་རྒྱུན་ལས་ནས་མོས་མཐུན་དང་རྒྱབ་སྐྱོར་བྱེད་རྒྱུའི་ཐག་གཅོད་བྱུང་ལགས། ༽ ཞེས་འཁོད་གནས་ལ་འབྱོར་བྱུང་བ་དང་། དེ་བཞིན་སིཌ་ཎི་བོད་རིགས་མཐུན་ཚོགས་ནས་ཀྱང་༼ གྲོས་མཐུན་ཡིག་ཆ་བཞིན་རྒྱུན་ལས་ནས་ཀྱང་མོས་མཐུན་རྒྱབ་སྐྱོར་ཐོབ་པ་དང་། དེ་བཞིན་ཚོགས་གཙོ་གསར་པ་རྔ་བ་ཆོས་འཛིན་དང་། ཚོགས་གཞོན་གསར་པ་ངག་དབང་སྒྲོན་གསལ་གཉིས་ལ་གཏན་འཁེལ་བྱུང་སོང་། ༽ ཞེས་ཕུལ་འབྱོར་བྱུང་སོང་ན། ད་རེས་ཕྱོགས་ གཉིས་ཀས་སྤྱི་དོན་དང་འདས་པ་ལས་མ་འོངས་པ་གལ་ཆེར་བརྩིས་ནས་བསམ་ཤེས་བྱས་པར་འབྲེལ་ཡོད་ཚང་མར་ཐུགས་རྗེ་ཆེ་ཞུ་རྒྱུ་ཡིན།
ལྷག་པར་སྐབས་དེའི་སིཌ་ཎི་བོད་རིགས་མཐུན་ཚོགས་ཀྱི་ཚོགས་གཙོ་མིག་དམར་ཚེ་རིང་དང་ཚོགས་གཞོན་ཐུབ་བསྟན་རྒྱལ་མཚན་གཉིས་ནས་གུ་ཡངས་བསམ་ཤེས་དང་། སིཌ་ཎི་བོད་རིགས་དང་བླངས་མི་མང་གི་རྒྱུན་ལས་བཅས་ཕྱོགས་གཉིས་ཀས་མཐུན་སྒྲིལ་དང་སྤྱི་དོན་གལ་འགངས་ཆེ་བ་བརྩིས་པར་བསྔགས་བརྗོད་ དང་རྗེས་སུ་ཡི་རངས་ཞུ་རྒྱུ་ཡིན། དེ་མཚུངས་གོ་སྐབས་འདི་བརྒྱུད་སིཌ་ཎི་ཁུལ་གནས་རང་རིགས་རྒྱ་ཆེ་མང་ཚོགས་ནས་ཀྱང་ད་བར་བབ་བརླིང་བརྟན་གསུམ་གྱིས་རྩ་དོན་རས་སུ་མ་བོར་བར་གནས་པར་ཐུགས་རྗེ་ཆེ་ཞུ་རྒྱུ་ཡིན།” ཞེས་བཀོད་འདུག
གཞན་ཡང་གསལ་བསྒྲགས་དེའི་ནང་། “དེ་རིང་ནས་བཟུང་སིཌ་ཎི་བོད་མི་ནང་ཁུལ་གྱི་དཀའ་རྙོག་དེ་གཙང་སེལ་བྱུང་བར་ངོས་འཛིན་གྱིས་མ་འོངས་ལས་དོན་གནང་ཕྱོགས་གཤམ་གསལ་ལྟར་ཡིན།
༡། བོད་མི་ཡོངས་ཀྱི་བླ་ན་མེད་པའི་དབུ་ཁྲིད་སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་དགུང་གྲངས་ ༨༧ ལ་ཕེབས་བཞེས་ཀྱི་ྋསྐུའི་འཁྲུངས་སྐར་དུས་ཆེན་སྲུང་བརྩི་ཞུ་རྒྱུའི་གཙོས་མ་འོངས་པར་གཞུང་འབྲེལ་གྱི་མཛད་སྒོ་དང་། ལས་འགུལ་ཁག་ཚང་མ་སིཌ་ཎི་བོད་རིགས་མཐུན་ཚོགས་ཀྱིས་གོ་སྒྲིག་ཞུས་པར་མི་མང་ཚང་མས་མཉམ་ཞུགས་དང་། ལས་དོན་ཡོངས་རྫོགས་ཚགས་ཚུད་ལམ་ལྷོང་ཡོང་བར་ཕྱར་གྲུ་མཉམ་འདེགས་གནང་གལ།
༢། སིཌ་ཎི་བོད་རིགས་མཐུན་ཚོགས་ཀྱི་རྒྱུན་ལས་ཚོགས་གཙོ་ཟུར་པ་མིག་དམར་ཚེ་རིང་དང་ཚོགས་གཞོན་ཟུར་པ་ཐུབ་བསྟན་རྒྱལ་མཚན་གཉིས་ནས་སྐབས་ ༡༨ པའི་རྒྱུན་ལས་འོས་མིར་ལངས་རྒྱུ་མིན་པའི་ཁས་ལེན་ལ་དོན་འཁྱོལ་དགོས་རྒྱུ།
༣། ད་ནས་སིཌ་ཎི་བོད་རིགས་དང་བླངས་མི་མང་གི་ལས་དོན་ཡོངས་རྫོགས་མཚམས་འཇོག་དགོས་རྒྱུ།
༤། གསལ་བསྒྲགས་འདི་སྤེལ་ཉིན་ནས་སིཌ་ཎི་ཁུལ་གྱི་དཀའ་རྙོག་ནམ་མཁའ་གཡའ་དག་དང་ས་རྡུལ་དག་གི་དཔེ་ལྟར་གཙང་སེལ་གྱིས༧རྒྱལ་བ་དགྱེས་པའི་མཆོད་སྤྲིན་དུ་གྱུར་བ་ཡིན་པས། སླད་ནས་དེ་འབྲེལ་རྙོག་གླེང་བསྐྱར་དུ་མི་ཡོང་བ་ཚང་མས་འགན་འཁུར་དགོས་རྒྱུ།
༥། མཐའ་དོན་སྤྱི་ནོར་ྋགོང་ས་ྋསྐྱབས་མགོན་ཆེན་པོ་མཆོག་སྐུ་ཚེ་ྋཞབས་པད་བསྐལ་བརྒྱར་བརྟན་ཅིང་། བོད་བསྟན་སྲིད་མི་རིགས་དང་བཅས་པ་ཛ་དྲག་གི་དུས་སྐབས་འདིར་ཚང་མས་གོང་བུའི་ནུས་པ་གཅིག་ཏུ་བསྒྲིལ་ཏེ་སྤྱི་པའི་རྩ་དོན་ཐོག་སྔར་ལྷག་འབད་འབུངས་གནང་གལ་ཆེ་བ་ཞུ་རྒྱུ།” བཅས་བཀོད་འདུག
