ཨོ་སི་ཊོ་ལི་ཡའི་འོས་ཤོག་འཕེན་མཁན་མི་མང་མང་ཆེ་བས་རྒྱབ་སྐྱོར་མེད་ཅེས་འོས་ཤོག་འཕེན་ཡོད་པ་དང་། མང་མོས་འོས་བསྡུ་འདི་ནི་འདས་པའི་ལོ་ངོ་ ༢༤ ནང་ཐེངས་དང་པོ་དེ་ཆགས་ཀྱི་ཡོད་པ་རེད།
ཏཱ་སི་མ་ནིང་ཨ་ནས་ཡིན་པའི་བུད་མེད་འདིས་ཁ་མོས་རྒྱབ་སྐྱོར་མེད་ NO ལ་འོས་ཤོག་འཕེན་ཡོད་སྐོར་བརྗོད་འདུག
ངས་མི་མང་པོ་ཞིག་ལ་བཤད་པ་ཡིན། འདི་འདྲའི་འོས་བསྡུ་ཞིག་དགོས་ཀྱི་རེད་བསམས་ཀྱི་མི་འདུག སེམས་སྐྱོ་དགོས་པ་ཞིག་ལ་ཁོང་ཚོ་ཡང་ཁོང་ཚོ་རང་ཉིད་ལས་ཁ་བྲལ་དུ་གཏོང་གི་ཡོད་པའི་གནས་སྟངས་ཤིག་མཐོང་གི་འདུག གདོད་མའི་མི་རིགས་ཁོང་ཚོ་རང་ཉིད་ཀྱིས་ཀྱང་དེ་འདྲ་ཞིག་འདོད་པ་ཡོད་ཀྱི་མ་རེད་བསམས་ཀྱི་འདུག་ཅེས་གསུངས་འདུག
ཨོ་སི་ཊོ་ལི་ཡའི་བྱང་ཕྱོགས་ས་ཁུལ་དང་མངའ་སྡེ་གཞན་དག་ལྟར་ཏཱ་སི་མ་ནིང་ཨ་མངའ་སྡེའི་འོས་ཤོག་འཕེན་མཁན་མང་ཆེ་བས་ཀྱང་ཁོང་ཚོའི་བསམ་ཚུལ་ལྟར་གནད་དོན་དེར་རྒྱབ་སྐྱོར་བྱས་མེད་པ་རེད།
ཨོ་སི་ཊོ་ལི་ཡའི་རྒྱལ་ས་ཁེམ་བྷེ་ར་མངའ་ཁུལ་དུ་འོས་ཤོག་འཕེན་མཁན་མང་ཆེ་བས་གདོད་མའི་མི་རིགས་ཀྱི་དགོས་འདུན་འབོད་སྒྲ་དེ་རྩ་ཁྲིམས་ནང་བཅུག་རྒྱུར་མོས་མཐུན་རྒྱབ་སྐྱོར་ཡོད་ Yes ཞེས་འོས་ཤོག་འཕེན་ཡོད་པ་རེད།
རྒྱབ་སྐྱོར་ཡོད་ Yes ལ་ལས་འགུལ་སྤེལ་མཁན་ཐོ་མཱ་སི་མཱ་ཡོ་ Thomas Mayo ལགས་ཀྱིས་ཁོང་ཉིད་བློ་ཕམ་ཆེན་པོ་བྱུང་སྐོར་གསུངས་འདུག
ང་ཚོས་གནད་དོན་འདིའི་ཐོག་དཀའ་ལང་མང་པོ་ཞིག་བརྒྱབ་པ་ཡིན། དཀའ་ལས་དེ་ཉེ་བའི་ཆར་གཅིག་པུར་བརྒྱབ་པ་ཞིག་མ་རེད། ཁང་པ་འདིའི་ནང་ཡོད་མཁན་དེ་ཚོ་གཅིག་པུ་མ་རེད། རྒྱལ་ཡོངས་སུ་མི་ཁྲི་བདུན་ ༧༠༠༠༠ ཙམ་གྱིས་དཀའ་ལས་བརྒྱབ་ཡོད་པ་རེད། གདོད་མའི་མི་རིགས་ཀྱི་དབུ་ཁྲིད་ཚོས་ཨོ་སི་ཊོ་ལི་ཡའི་མི་མང་རྣམས་ལ་རེ་བ་དང་ཡིད་ཆེས་བཅོལ་ཡོད་པ་རེད། ལོ་ངོ་བཅུ་ཕྲག་མང་པོར་ང་ཚོའི་ཐོབ་ཐང་ཆེད་ང་ཚོས་དཀའ་ལས་བརྒྱབ་པ་དང་འཐབ་རྩོད་བྱས་པ་དེ་དོ་དགོང་རྡུང་རྡེབ་ཕོག་སོང་ཞེས་གསུངས་འདུག
ཨོ་སི་ཊོ་ལི་ཡའི་སྲིད་བློན་ཨན་ཐོ་ནིང་ཨལ་བྷ་ནེ་སི་ Anthony Albanese མང་མོས་འོས་བསྡུའི་གྲུབ་འབྲས་དེ་ངོས་ལེན་བྱ་རྒྱུ་ཡིན་སྐོར་གསལ་བསྒྲགས་སྤེལ་ཡོད་པ་རེད།
སྲིད་བློན་ཨན་ཐོ་ནིང་གིས་མང་གཙོའི་ལམ་ནས་ཨོ་སི་ཊོ་ལི་ཡའི་མི་མང་གིས་ཐག་གཅོད་དེ་ངས་མཐའ་གཅིག་ཏུ་གུས་བརྩི་ཞུ་རྒྱུ་ཡིན། དེ་རིང་ཁ་སང་འཛམ་གླིང་ནང་གནས་ཚུལ་སྣ་ཚོགས་ཀྱི་ལྷག་གི་ཡོད་ཀྱང་ང་ཚོས་ཞི་བདེ་དང་འདྲ་མཉམ་ཐོག་ནས་ཐག་གཅོད་ཆེན་པོ་ཞིག་བྱས་ཡོད་པ་རེད། རྒྱལ་ཡོངས་ཀྱིས་དྲི་བ་དེ་ཚོ་ལ་ངོས་འཛིན་གསར་པ་ཞིག་བྱུང་ཡོད་པ་རེད་ལ། བརྒྱུད་ལམ་དེས་རྒྱལ་ཁབ་ཀྱི་དམིགས་ཡུལ་གསར་པ་ཞིག་ལ་དྲིས་ལན་རྙེད་ཡོད་པ་རེད་ཅེས་གསུངས་འདུག
གདོད་མའི་མི་རིགས་ཀྱི་བློན་ཆེན་ལིན་ཌ་བྷུར་ནེ་ Linda Burney ཁོ་མོས་སེམས་ཚོར་དང་བཅས་ཏེ་ཁ་ཐུག་གདོད་མའི་མི་རིགས་རྣམས་ལ་གསུངས་དོན།
ཉེ་བའི་ཟླ་བ་ཁ་ཤས་ནང་དཀའ་ལས་ཁག་པོ་བྱུང་ཡོད། ཡིན་ན་ཡང་སོ་སོ་རང་ཉིད་སུ་ཡིན་མིན་ལ་སྤོབས་པ་སྐྱེ་དགོས་པ་རེད་ལ། སོ་སོ་རང་ཉིད་ཀྱི་ངོ་བོ་དེ་ལ་སྤོབས་པ་སྐྱེ་དགོས་པ་རེད། མ་ཚད་ལོ་ངོ་ ༦༥༠༠༠ ཙམ་གྱི་ལོས་རྒྱུས་དང་རིག་གཞུང་ལྡན་པའི་མི་རིགས་ཤིག་གི་ཆ་ཤས་དང་། རྒྱལ་ཁབ་འདིའི་ནང་བདག་དབང་ཡོད་པའི་མི་རིགས་ཤིག་ཡིན་པར་སྤོབས་པ་སྐྱེས་དགོས། ང་ཚོས་མ་འོངས་པར་མུ་མཐུད་འབད་བརྩོན་དང་མདུན་སྐྱོད་བྱེད་དགོས། འདི་ནི་མཐུན་འགྲིག་ཡོང་བར་བྱེད་པའི་མཇུག་སྒྲིལ་བ་ཞིག་མ་ཡིན་ལ། ཟླ་བ་འགའ་ཤས་ནང་ཚུད་དུ་ངས་ང་ཚོའི་གཞུང་ལ་སྟོང་ཆ་འདི་ངེས་པར་དུ་བསྐོང་ཐབས་བྱེད་དགོས་པའི་འབོད་སྐུལ་ཞུ་རྒྱུ་ཡིན་ཞེས་གསུངས་འདུག
ཕྱོགས་འགལ་ཚོགས་པའི་འགོ་ཁྲིད་ཕི་ཊར་དྷུན་ཊོན་ Peter Dutton མང་མོས་འོས་བསྡུ་ལས་ No ལ་འོས་ཤོག་མང་བ་ཐོབ་པ་དེ་རྒྱལ་ཁབ་ལ་ཡག་པོ་བྱུང་བ་རེད་ཅེས་གསུངས་འདུག
ཁོའི་རྩོད་གླེང་གི་ནང་དུ་ངས་ཐོག་མཐའ་བར་གསུམ་དུ་ང་ལ་བསམ་ཚུལ་ངན་པ་ཞིག་ཡོད་པའི་སྐྱོན་བརྗོད་ཅིག་ཡིན་པར་འདོད་སྲིད་ཀྱང་། ཨོ་སི་ཊོ་ལི་ཡའི་ཤུལ་བཞག་དང་ཡང་ན་ཁོ་ཚོ་ང་ཚོའི་རྒྱལ་ཁབ་ཏུ་ཡོང་བའི་དུས་ཚོད་ལ་གཞིགས་ནས་ཁོ་ཚོ་དབྱེ་འབྱེད་བྱེད་ཀྱི་ཡོད། ཨོ་སི་ཊོ་ལི་ཡའི་མི་ཡོད་ཚད་དང་འདྲ་བར་གདོད་མའི་མི་རིགས་རྣམས་ནུས་ཤུགས་ཞན་པ་མཐོང་ཐུབ་པའི་རེ་བ་བྱེད་ཀྱི་ཡོད། འོས་བསྡུ་ལས་བསམ་འཆར་མི་འདྲ་བ་ཡོད་སྲིད་ཀྱང་བསམ་འཆར་མི་འདྲ་བ་དེ་དག་གིས་ང་ཚོས་རྒྱལ་ཁབ་ལ་དགའ་ཞེན་བྱེད་ཚད་ཆུང་དུ་གཏོང་མི་ཐུབ་ལ་ང་ཚོས་ཕན་ཚུན་ལ་གུས་བརྩི་ཆུང་དུ་ཡང་གཏོང་མི་སྲིད་ཅེས་གསུངས་འདུག
གྲོས་ཚོགས་གོང་མའི་འཐུས་མི་ཇཱ་ཤེན་ཏཱ་ Jacinta Nampijinpa ལགས་ཀྱིས་ཁོ་མོས་རྒྱབ་སྐྱོར་མེད་ No ལ་དགའ་བསུ་བྱས་འདུག
ཕྱི་ལོ་ ༢༠༢༣ ལོའི་གདོད་མའི་མི་རིགས་ཀྱི་དགོས་འདུན་འབོད་སྒྲ་སྐོར་མང་མོས་འོས་བསྡུའི་གནས་ཚུལ་ཁག་ SBS གསར་ཁང་གི་གསར་འགྱུར་བརྒྱུད་ལམ་ཁག་ལ་གསན་གཟིགས་གནང་རྒྱུ་ཡོད་པས་མ་ཚད། གདོད་མའི་མི་རིགས་ཀྱི་སྣང་བརྙན་མཚོན་པའི་བརྙན་འཕྲིན་ NITV ཐོག་ནས་ཀྱང་གནས་ཚུལ་ཁག་གསན་གཟིགས་རྒྱུ་ཡོད།
SBS གསར་ཁང་གིས་མང་མོས་འོས་བསྡུ་སྐོར་ཆེད་སྒྲིག་ལེ་ཚན་ཁག་དྲ་ཐག་
SBS Voice Referendum portal འདི་ནས་གཟིགས། མ་ཚད་མང་མོས་འོས་བསྡུ་སྐོར་རྩོམ་ཡིག་དང་། སྒྲ་སྒམ། བརྙན་པར་སོགས་གསར་འགྱུར་གསར་ཤོས་ཁག་ SBS ཡི་ཁྱོན་སྐད་ཡིག་ཁག་ ༦༠ ཙམ་གྱི་ནང་གསན་གཟིགས་གནང་རྒྱུ་ཡོད།
