د ۲۰۲۴ کال د جولای میاشتې له لومړۍ نېټې څخه به د نوي پاسپورت ترلاسه کول د آسټرالیایانو لپاره ۱۵ سلنه زیات لګښت ولري.
د روان ۲۰۲۳ کال د جنوری په لومړی نېټه د آسټرالیا د پاسپورټ بیه له ۳۰۸ ډالرو څخه ۳۲۵ ډالرو ته پورته شوه.
د راتلونکي مالي کال له پیل څخه به د یوه بالغ شخص د ۱۰ کلن پاسپورټ بیه ۳۹۴ آسټرالیايي ډالرو ته ورسېږي.
اوسمهال د یوه آسټرالیايي پاسپورټ بیه د نړۍ د یو زیات شمېر هېوادونو په پرتله لوړه ده. د بېلګې په توګه په نوي زیلنډ کې د یوه ۱۰ کلن پاسپورټ بیه ۱۹۲ ډالر او په کاناډا کې ۱۷۹ ډالره دی.
حکومت وايي چې له دغه کار سره به په دریو کلونو کې ۳۴۹ ډالره عاید را ټول شي او دغه عاید به په هغو کارونو کې ولګول شي چې لومړیتوب لري.
د آسټرالیا خزانه دار جیم چالمرز وايي، دا زیاتوالی "نسبتاً معتدل" دی چې اضافي امنیتي ګټې به رامنځ ته کړي.
د بهرنیو چارو وزارت ویلي چې اضافي فیسونه به د پاسپورټ سیسټم عصري کولو لپاره وکارول شي.
زموږ خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
