ඔස්ට්‍රේලියාවේ තවමත් ඇතැම් ක්ෂේත්‍රවල පුහුණු ශ්‍රමිකයින්ගේ හිඟය බරපතල ලෙස පවතී.
එනිසාම එම ක්ෂේත්‍රවල ඇතැම් රැකියා පුරප්පාඩු සඳහා ශ්‍රමිකයින්ගේ විශාල ඉල්ලුමක් ඇතිවී තිබේ.
සෞඛ්‍ය ක්ෂේත්‍රය එවැනි වූ එක් ක්ෂේත්‍රයකි.
මෙවැනි ඉහළ ඉල්ලුමක් ඇති වෘත්තීන් හරහා ඔස්ට්‍රේලියාවේ ස්ථිර පදිංචිය ලබා ගැනීමටද බොහෝ විට පහසු වේ.
ඔස්ට්‍රේලියාවේ ප්‍රධාන පෙළේ රැකියා සෙවුම් වෙබ් අඩවියක් වන Indeed වෙබ් අඩවිය සඳහන් කළ පරිදි ඔස්ට්‍රේලියාවේ මේ වන විට සෞඛ්‍ය හා වෛද්‍ය ක්ෂේත්‍රයේ ඉහළ ඉල්ලුමක් පවතින රැකියා 10 ක් පිලිබඳව මෙම ලිපියෙන් ඉදිරිපත් කෙරේ.
ඒවායේ ප්‍රධාන වගකීම් මෙන්ම ඔස්ට්‍රේලියාවේ ජාතික මට්ටමින් සාමාන්‍ය වාර්ෂික වැටුපද මෙයින් ඉදිරිපත් කෙරේ.
01. Dietician
Dietician යනු තම සේවාදායකයින්ට පෝෂණය සහ ආහාර සහ සෞඛ්‍යය අතර සම්බන්ධතාවය පිළිබඳ විශේෂඥ දැනුමක් ලබා දෙන වෘත්තිකයෙකි.
රෝගියෙකු සමඟ සමීපව කටයුතු කිරීමෙන් සහ ඔවුන්ගේ පෝෂණ අවශ්‍යතා තක්සේරු කිරීමෙන් පසු, රෝගියාගේ සෞඛ්‍ය තත්වයන්ට සහ සමස්ත යහපැවැත්මට හොඳින් ගැලපෙන සුදුසුම ආහාර සැලැස්මක් මොවුන්ට නිර්මාණය කළ හැකිය.
Dietician කෙනෙකුට ඔස්ට්‍රේලියාවේ ජාතික මට්ටමින් සාමාන්‍ය වාර්ෂික වැටුප ඔස්ට්‍රේලියානු ඩොලර් 81,294 ක් බව සඳහන්.
02. Nursing Assistant
Nursing Assistant හෙවත් හෙද සහායකයකු යනු රෝහල්වල, correctional ආයතනවල, සාත්තු නිවාසවල සහ වෙනත් වෛද්‍ය මධ්‍යස්ථානවල සිටින රෝගීන්ට සහාය දක්වන සෞඛ්‍ය සේවා වෘත්තිකයෙකි.
ඔවුන් සාමාන්‍යයෙන් ලියාපදිංචි හෙදියකගේ අධීක්ෂණය යටතේ රාජකාරී කරයි.
ඔවුන්ගේ ඇතැම් ප්‍රධාන වගකීම් අතර නිවැරදි රෝගී වාර්තා තබා ගැනීම, හෙදියන් සමඟ සහයෝගයෙන් කටයුතු කිරීම සහ ඖෂධ හෝ ප්‍රතිකාර ලබා ගැනීමෙන් පසු රෝගීන් නිරීක්ෂණය කිරීම ඇතුළත් වේ.
ඔස්ට්‍රේලියාවේ හෙද සහායකයකුගේ සාමාන්‍ය වාර්ෂික වැටුප ඔස්ට්‍රේලියානු ඩොලර් 55,431 ක් ලෙස සටහන් වේ.
03. Massage therapist
Remedial, myotherapy, deep tissue හෝ pregnancy වැනි සම්බාහන ප්‍රතිකාරයේ විශේෂිත ක්ෂේත්‍රයක විශේෂීකරණය කිරීමට සම්බාහන චිකිත්සකයෙකුට හැකියාව ලැබේ.
සම්බාහන චිකිත්සකයෙකු සේවාදායකයාගේ ශරීරයේ මෘදු පටක හැසිරවීමට ස්පර්ශ සහ පීඩන ශිල්පීය ක්‍රම භාවිතා කරයි, එමඟින් වේදනාව සමනය කිරීමට සහ අභ්‍යන්තර තුවාල සුව කිරීමට උපකාර කරයි.
ඔස්ට්‍රේලියාවේ ජාතික මට්ටමින් නිරීක්ෂණය කරන කල මොවුන්ගේ සාමාන්‍ය පැයක වැටුප ඔස්ට්‍රේලියානු ඩොලර් 45.30 කි.
04. Emergency medical technician
Emergency medical technician (EMT) යනු රෝගීන්ට හදිසි ප්‍රතිකාර ලබා දෙන පුහුණු වෘත්තිකයෙකි.
මොවුන් බොහෝ විට ගිලන් රථවල හෝ රෝහල්වල හදිසි කාමරවල පරිපූරක වෛද්‍යවරුන් සමඟ වැඩ කරයි.
රෝහලකට යන අතරතුර රෝගියාගේ සෞඛ්‍ය තත්ත්වය තක්සේරු කිරීම, රෝගීන්ගේ සිදුවීම් වාර්තා ලිවීම සහ ගිලන් රථයක් අවශ්‍ය වෛද්‍ය උපකරණ සමඟ හොඳින් ගබඩා කර ඇති බවට වග බලා ගැනීම ඇතුළු රාජකාරි මාලාවක් ඉටු කිරීම සඳහා මොවුන් වගකිව යුතුය.
Emergency medical technician කෙනෙකුට ඔස්ට්‍රේලියාවේ ජාතික මට්ටමින් සාමාන්‍ය වාර්ෂික වැටුප ඔස්ට්‍රේලියානු ඩොලර් 59,200 ක් බව සඳහන්.
05. Family nurse practitioner
පවුල් හෙද වෘත්තිකයින් සෑම වයස් කාණ්ඩයකම රෝගීන් සඳහා පවුල් කේන්ද්‍රීය සත්කාර සපයයි.
පවුල් හෙද වෘත්තිකයෙකු බොහෝ විට ලියාපදිංචි හෙදියක් වන අතර ඔහු හෝ ඇය විශ්ව විද්‍යාලයේ පශ්චාත් උපාධි අධ්‍යයන කටයුතු සම්පූර්ණ කර, ඔවුන්ට උසස් වෛද්‍ය පුහුණුවක් ලබා දී රෝගීන් හඳුනා ගැනීමට සහ ඖෂධ නියම කිරීමට ඉඩ සලසයි.
ඔස්ට්‍රේලියාවේ පවුල් හෙද වෘත්තිකයෙකුගේ සාමාන්‍ය වාර්ෂික වැටුප ඔස්ට්‍රේලියානු ඩොලර් 79,066 ක් ලෙස සටහන් වේ.
———————————————————————————
ඩිජිටල් සහ සමාජ මාධ්‍ය ජාලයන්හි අපගේ SBS සිංහල සේවය හා සම්බන්ධ වීමට:
SBS Audio App: App Store හෝ Google Play වෙතින් SBS Radio App නොමිලයේ Download කරගෙන සජීවීව SBS සිංහල වැඩසටහන සහ අපගේ අනෙකුත් podcast වලට සවන් දෙන්න.
———————————————————————————
06. Dental assistant
දන්ත වෛද්‍යවරයකු රෝගියෙකුට ප්‍රතිකාර කරන අතරතුර දන්ත වෛද්‍ය සහායකයකු දන්ත සායනයක පරිපාලන කටයුතු සිදු කරන අතර දන්ත වෛද්‍යවරයාට සහාය සපයයි.
රෝගීන්ව වෛද්‍ය පරීක්ෂණය සඳහා සූදානම් කිරීම, ඔවුන්ගේ වෛද්‍ය ලේඛන පිරවීමට උපකාර කිරීම සහ අදාළ ක්‍රියා පටිපාටිය විස්තර කරමින් ඔවුන්ගේ දන්ත ප්‍රතිකාර සඳහා රෝගීන්ව සූදානම් කිරීම මොවුන්ගේ මූලික රාජකාරීවලට ඇතුළත් වේ.
ඔස්ට්‍රේලියාවේ ජාතික මට්ටමින් නිරීක්ෂණය කරන කල මොවුන්ගේ වාර්ෂික වැටුප ඔස්ට්‍රේලියානු ඩොලර් 55,298 කි.
07. Audiologist
Audiologist යනු ශ්‍රවණය සහ සමතුලිතතාවය ඇතුළු කන් ආශ්‍රිත තත්ත්වයන් පිළිබඳ විශේෂඥ සෞඛ්‍ය සේවා වෘත්තිකයන් වේ.
රෝගියෙකුගේ රෝගී තත්ත්වය තක්සේරු කිරීමෙන් පසු, ශ්‍රවණාධාර, ear plugs සහ cochlear බද්ධ කිරීම් වැනි උපකරණ නිර්දේශ කිරීමෙන් ඔවුන්ට ශ්‍රවණ ආබාධ කළමනාකරණය කළ හැකිය.
සියලුම වයස්වල රෝගීන් සඳහා ශ්‍රවණාබාධ හඳුනා ගැනීම සහ ප්‍රතිකාර කිරීම ඇතුළුව බොහෝ වැදගත් කාර්යයන් රැසක් මොවුන් ඉටු කරයි.
Audiologist කෙනෙකුට ඔස්ට්‍රේලියාවේ ජාතික මට්ටමින් සාමාන්‍ය වාර්ෂික වැටුප ඔස්ට්‍රේලියානු ඩොලර් 87,525 ක් බව සඳහන්.
08. Physical therapist
භෞත චිකිත්සකයෙකු යනු රෝගීන්ගේ චලන පරාසය වැඩිදියුණු කිරීමෙන් සහ තවදුරටත් තුවාල වීම වැළැක්වීම මගින් තුවාල හෝ නිදන්ගත තත්වයන්ට ප්‍රතිකාර කිරීමට උපකාර කරන පුහුණු වෘත්තිකයෙකි.
ඔස්ට්‍රේලියාවේ භෞත චිකිත්සකයෙකුගේ සාමාන්‍ය වාර්ෂික වැටුප ඔස්ට්‍රේලියානු ඩොලර් 74,376 ක් ලෙස සටහන් වේ.
09. Biomedical engineer
ජෛව වෛද්‍ය ඉංජිනේරුවන් ජීව විද්‍යාව සහ වෛද්‍ය විද්‍යාව සඳහා ඉංජිනේරු මූලධර්ම සහ ශිල්පීය ක්‍රම යෙදීමෙන් සෞඛ්‍ය ආරක්ෂණ විසඳුම් ඇගයීම සහ සැලසුම් කරයි.
ජෛව වෛද්‍ය ඉංජිනේරුවන්ට ශල්‍ය වෛද්‍යවරුන් සහ වෛද්‍ය පර්යේෂකයන් සමඟ සමීපව කටයුතු කළ හැකි අතර ඔවුන් ජෛව වෛද්‍ය උපකරණ ස්ථාපනය කිරීම සහ අලුත්වැඩියා කිරීම, ජෛව වෛද්‍ය උපකරණ භාවිතා කරන ආකාරය වෛද්‍යවරුන්ට සහ රෝගීන්ට පෙන්වීම සහ තාක්ෂණික වාර්තා සහ academic papers ලිවීම වැනි වැදගත් කාර්යයන් රාශියක් ඉටු කරයි.
ඔස්ට්‍රේලියාවේ ජාතික මට්ටමින් නිරීක්ෂණය කරන කල මොවුන්ගේ වාර්ෂික වැටුප ඔස්ට්‍රේලියානු ඩොලර් 88,454 කි.
10. Pharmacist
Pharmacist හෙවත් ඖෂධවේදියෙකු යනු රෝගීන්ට ඖෂධ වට්ටෝරුවලට අදාළ ඖෂධ ලබාදෙන සෞඛ්‍ය සේවා වෘත්තිකයෙකි.
මොවුන් බොහෝ විට රෝහල්වල පිහිටා ඇති ඔසුසලක හෝ ප්‍රජා ඔසුසලක සේවය කරන අතර, මොවුන්ගේ කාර්ය භාරය වන්නේ රෝගියෙකුගේ ඖෂධ සකස් කිරීම සහ නිවැරදි මාත්‍රාව කුමක්ද සහ ඇතිවිය හැකි අතුරු ආබාධ ඔවුන්ට පැහැදිලි කිරීමය.
ඔස්ට්‍රේලියාවේ ජාතික මට්ටමින් නිරීක්ෂණය කරන කල මොවුන්ගේ සාමාන්‍ය පැයක වැටුප ඔස්ට්‍රේලියානු ඩොලර් 44.58 කි.
———————————————————————————-
මෙම ලිපියේ ඉදරිපත් කරන තොරතුරු සාමාන්‍ය සහ මූලික තොරතුරු වේ. ඔස්ට්‍රේලියාවේ රැකියාවක් ලබාගැනීමට සහ ස්ථිර පදිංචිය ලබා ගැනීම සඳහා ඔබ සැපිරිය යුතු දේ ඔබේ අධ්‍යාපන සුදුසුකම් සහ ඔබේ පළපුරුද්ද මෙන්ම ඔස්ට්‍රේලියානු සංක්‍රමණික අවශ්‍යතා ඔබ සපුරන්නේ කෙසේද යන්න මත පදනම් වන බැවින් ඔබට සුදුසු මාර්ගය සහ ඔබ ඊට සුදුසු දැයි දැනගැනීමට ලියා පදිංචි සංක්‍රමණ ඒජන්තවරයකු වෙත ගොස් හෝ පහත රජයේ නිල වෙබ් අඩවිය වෙත ගොස් හෝ තොරතුරු ලබා ගැනීම සුදුසු වේ.
———————————————————————————-
ඔස්ට්‍රේලියාවේ ස්ථිර පදිංචිය ඉක්මණින් ලබා ගැනීමට හැකියාව ඇති වෛද්‍ය හා සෞඛ්‍ය වෘත්තීන්
ඔස්ට්‍රේලියාවේ ස්ථිර පදිංචිය ඉක්මණින් සහ වැඩි කරදරයකින් තොරව ලබා ගැනීමට හැකියාව ඇති වෛද්‍ය හා සෞඛ්‍ය වෘත්තීන් අතර පහත වෘත්තීන් තුන මේ වන විට ප්‍රධාන තැනක් ගන්නා බව මෙල්බර්න් නුවර සංක්‍රමණ නීති පිළිබඳ උපදේශකවරයකු ලෙස කටයුතු කරන නීතිඥ තිලංග ෆොන්සේකා මහතා SBS සිංහල ගුවන් විදුලියට පැවසීය.
- වෛද්‍යවරුන්
- හෙද වෘත්තිකයින්
- ඖෂධවේදීන්
