د پاکستان د کرېکټ ملي لوبډلې پخوانی لوبغاړی شاهد افریدی وايي که چېرې ورته فرصت برابر شي نو حاضر دی چې د افغانستان د کرېکټ ملي لوبډلې د روزونکي مسئولیت پرغاړه واخلي.
ښاغلی افریدی چې اوسمهال آسټرالیا ته په سفر راغلی، د اس بي اس پښتو راډیو د دغې پوښتنې په ځواب چې آیا د غوښتنې په حالت کې به د افغانستان د ملي لوبډلې د روزونکي مسئولیت ومني او که نه؟ ویلي که چېرې ورڅخه غوښتنه وشي یا فرصت برابر شي حاضر دی چې ملاتړ وکړي.
هغه وايي: " زموږ خپل خلک دي، زما خپله ورسره یو تعلق دی، زموږ د مشرانو د هغوي له مشرانو سره یو تعلق وه."
"چې کله هم ماته فرصت برابر شي، یقیناً زه حاضر یم."
ښاغلی افریدی وايي چې د افغانستان ملي لوبډلې د ۲۰۲۳ کال د یو ورځنیو لوبو په نړیوال جام کې د پام وړ ښې لوبې ترسره کړي او هیله لري چې د ۲۰ اوریزو او یو ورځنیو لوبو ترڅنګ به په تېسټ لوبو کې هم ښه ټیم جوړ شي.
د کرېکټ په نړۍ کې دغه پېژندل شوی لوبغاړی د پښتنو د استعداد ستاینه هم کوي او وايي چې د افغانستان خو تقریباً ټول لوبغاړي پښتانه دي، مګر د پاکستان ښه لوبغاړي هم له خیبر پښتونخوا سره تعلق لري.
"کوم ټېلېنټ (استعداد) چې له KPK (خیبر پښتونخوا) نه راځي هغه ډېر زبردست ټېلېنټ ده او کله کله حیران شم چې سهولتونه دومره زیات ندي، د هغه با وجود هم دومره ټېلېنټ هلته نه راځي."
"امید کوم چې انشاالله څومره پخواني کریکټران چې تعلق یې له خیبر پښتونخوا سره ده، هغوی هلته [خیبر پښتونخوا کې] د ښو اکاډمیو جوړول شروع کړي."
زموږ خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
